Qaybinta 20 fiiso oo Mareykanku bixiyey si xubno Soomaali ah uga qaybgalaan shirka Golaha Ammaanka ee Qaramada Midoobay ee Sebteembar 2026 ayaa dhalisay su’aalo cusub oo ku saabsan matalaadda siyaasadeed. Sida xogtu tilmaamayso, sagaal ka mid ah fiisayaasha waxaa helay Madaxweynaha North Western State of Somalia, Cabdirahman Maxamed Cabdullaahi (Cirro), halka 11-ka kale loo qoondeeyey dhinaca dowladda federaalka Soomaaliya.
Wararku waxay intaas ku darayaan in Madaxweynihii hore ee Xasan Sheekh Maxamuud shan ka mid ah 11-ka fiiso uu siiyey siyaasiyiin reer North Western State of Somalia ah oo ku sugan Muqadisho. Kuwaas waxaa ugu horreeya Ra’iisulwasaare Saalax Jaamac, waxaana ku jira xubno kale oo kasoo jeeda North Western State of Somalia. Hase yeeshee, illaa hadda ma muuqato xog cad oo muujinaysa in matalaad loo qoondeeyey dadka kasoo jeeda Waqooyi Bari.
- Advertisement -
Haddii xogtan ay sax tahay, su’aashu waxay noqonaysaa: maxaa keenay in dadka reer North Western State of Somalia ee Muqadisho jooga loo furo fursad ay shirka uga qaybgalaan, halka Waqooyi Bari aan weli laga hayn matalaad muuqata?
Xasan Sheekh iyo Cirro
Waxaa muuqata in Madaxweyne Xasan Sheekh uu doonayo inuu New York kula yeesho Madaxweyne Cirro wada-hadal siyaasadeed oo ku saabsan xiriirka Soomaaliya iyo North Western State of Somalia. Haddii kulankaasi qabsoomo, wuxuu noqon karaa fursad lagu raadiyo heshiis ama is-afgarad cusub oo labada dhinac ah.
Si kastaba, heshiis waara kuma koobnaan karo Xasan Sheekh iyo Cirro oo keliya. Soomaaliya waxaa ka jira dhinacyo kale oo ay tahay in si dhab ah loo tixgeliyo, gaar ahaan dadka iyo maamullada ay arrimahani si toos ah u saameeyaan.
Waqooyi Bari, maxaa u tallo ah?
Waqooyi Bari waa inay ka gudubtaa siyaasadda cabashada iyo sugitaanka in Muqadisho qof u soo xusho. Su’aashu kuma eka: “Maxaa fiiso naloo siin waayey?” Su’aasha muhiimka ahi waa: “Maxaan rabnaa, yaase na matalaya, sideese codkeenna ugu gudbin karnaa caalamka?”
Waqooyi Bari waxay u baahan tahay mowqif siyaasadeed oo mideysan, ajande cad iyo xiriirro diblomaasiyadeed oo joogto ah. Haddii aysan iyadu dejisan ajandaheeda, waxaa dhici karta in siyaasadaha Muqdisho iyo Hargeysa ay go’aamiyaan mustaqbalka arrimaha sida tooska ah u taabanaya.
Gunaanad
Haddii 20-ka fiiso loo qaybiyey sida la sheegay, arrintu ma aha oo keliya qorshe safar; waxay taabanaysaa su’aal weyn oo ku saabsan matalaadda siyaasadeed iyo cidda codkeeda laga maqlayo fagaaraha caalamka.
Haddii Xasan Sheekh uu doonayo heshiis dhab ah oo uu la gaaro Cirro, waa inuu fahmaa in xalka Soomaaliya uusan ku koobnayn Muqdisho iyo Hargeysa. Waqooyi Bari-na waa inay garwaaqsataa in aan lagu casuumin siyaasadda weyn oo keliya marka dano kale loo baahdo.
New York waa goob shir, balse siyaasadda Waqooyi Bari waa inay ka bilaabataa ka hor inta aan la gaarin New York.
_________________________________
[email protected]
