Madaxweyne Donald Trump ayaa ku ammaanay Madaxweynaha Nigeria Bola Tinubu hoggaamintiisa ku aaddan la-dagaallanka argagixisada iyo amni-darrada, gaar ahaan weerarrada lagu beegsado bulshooyinka Masiixiyiinta ah, isaga oo mar kale xaqiijiyey sida Washington uga go’an tahay xoojinta iskaashiga amni ee ay la leedahay Nigeria.
Warqad ay baahisay Madaxtooyada Nigeria ayuu Trump ku tilmaamay iskaashiga difaaca ee Maraykanka iyo Nigeria mid muhiim ah. Waxa uu carrabka ku adkeeyey Qorshe-hawleedka Iskaashiga Difaaca ee 2026 iyo sii wadista iskaashiga dhinacyada wadaagga sirdoonka, tababarka milatariga iyo hawlgallada wadajirka ah ee la-dagaallanka argagixisada.
- Advertisement -
Madaxtooyadu waxay sheegtay in iskaashigu durba natiijooyin soo saaray, iyada oo tusaale u soo qaadatay hawlgal wadajir ah oo la sheegay in lagu dilay hoggaamiye sare oo ka tirsanaa ISIS, kana dhacay gobolka Harada Chad. Labada dal ayaa ballanqaaday inay sii xoojin doonaan xiriirkooda amni.
