Hargeysa (AX) – Guddiga Qaranka Xuquuqda Aadanaha ee Dawladda Waqooyi Galbeed Soomaaliya (SLNHRC) ayaa su’aal geliyay sharciyadda xarigga loo geystay abwaan iyo laba wariye, isagoo sheegay in mas’uuliyiintu ay xireen amar maxkamadeed la’aan isla markaana aysan raacin habraacyada sharciga ee looga baahan yahay.
War-saxaafadeed uu guddigu soo saaray Sabtidii, ayuu ku sheegay inuu dib u eegis ku sameeyay kiisaska abwaan Ismaaciil Yuusuf Jiheeye iyo wariye Cabdulqaanni Xuseen Abokor Baylood, kuwaas oo la xiray 29-kii Agoosto iyo 12-kii Sebtembar, siday u kala horreeyaan.
- Advertisement -
Jiheeye ayaa weli xiran gabay uu tiriyay awgiis, halka Baylood lagu eedeeyay inuu duubay oo baahiyay isla gabaygaas, ayuu guddigu sheegay.
“Labada ninba waxaa la xiray amar maxkamadeed la’aan, taas oo dhalinaysa walaac ah in aan la raacin dammaanadaha sharciga ee xukuma xarigga iyo xorriyadda shakhsiga,” ayuu guddigu yiri.
Guddigu wuxuu si gaar ah u sheegay inuu 10-kii Sebtembar helay war ku saabsan xarigga wariye Xasan Galaydh oo ay fuliyeen Waaxda Dembi-baarista.
Kadib markii uu wareysi kooban la yeeshay Galaydh, guddigu wuxuu sheegay inuu xaqiijiyay inaan si xun loola dhaqmin, balse uu sheegay in isagana la xiray amar maxkamadeed la’aan.
Galaydh ayaa la sii daayay maalmo ka hor, balse Jiheeye iyo Baylood ayaa weli xiran, sida uu guddigu sheegay.
Hay’adda xuquuqda ayaa dadweynaha, gaar ahaan wariyeyaasha iyo shaqaalaha kale ee warbaahinta, ugu baaqday inay taxaddar muujiyaan marka ay faafinayaan hadallo iyo macluumaad, iyagoo xushmeynaya xuquuqda iyo sumcadda dadka ay ka hadlayaan.
Waxay sidoo kale ugu baaqday hay’adaha ay khuseyso iyo dhammaan dhinacyada kale inay u hoggaansamaan sharciyada iyo habraacyada loo dejiyay ilaalinta xuquuqda muwaadiniinta.
Guddigu wuxuu soo dhoweeyay sii deynta Galaydh, wuxuuna mar kale ku celiyay in qof kasta oo xiran uu xaq u leeyahay caddaalad iyo ilaalinta xuquuqdiisa dastuuriga ah.
