Muqdisho (AX) — Xarunta Madaxtooyada Türkiye ee La-dagaallanka Macluumaadka Beenta ah ayaa beenisay sheegashooyinka baraha bulshada ee ah in Soomaaliya ay xayiraado fiiso oo cusub ku soo rogtay muwaadiniinta Turkiga.
Bayaan ay xaruntu soo saartay Isniintii ayaa lagu sheegay in habraacyada fiisaha iyo safarka ee u dhexeeya Türkiye iyo Soomaaliya aysan isbeddelin. Muwaadiniinta labada dal, ayay ku dartay, waxay sii wadaan safarrada ay ku marayaan nidaamyadii hore u jiray.
- Advertisement -
“Ma jiraan xayiraado cusub ama isbeddello sharci oo lagu sameeyay habraacyada fiisaha ee labada dal,” ayaa lagu yiri bayaanka.
Xaruntu waxay wararkaasi ku tilmaantay kuwo been abuur ah, iyadoo ka digtay in looga golleeyahay in lagu wiiqo xiriirka iyo iskaashiga ka dhexeeya Türkiye iyo Soomaaliya. Waxay dadweynaha ku boorrisay inay la xiriiraan hay’adaha rasmiga ah si ay u helaan macluumaad sax ah oo ku saabsan shuruudaha fiisaha iyo xeerarka safarka.
Türkiye waxay noqotay mid ka mid ah bahwadaagta caalamiga ah ee ugu muhiimsan Soomaaliya tan iyo markii Recep Tayyip Erdoğan, oo xilligaas ahaa ra’iisul wasaaraha Türkiye, uu booqday Muqdisho intii lagu jiray macluushii 2011. Ankara ayaa tan iyo markaas bixisay gargaar bani’aadannimo iyo taageero horumarineed, iyadoo taageertay mashaariicda caafimaadka, waxbarashada iyo kaabeyaasha dhaqaalaha. Shirkado Turki ah ayaa sidoo kale maamula garoonka diyaaradaha caalamiga ah ee Muqdisho iyo dekedda magaalada.
Iskaashigu wuxuu ku fiday dhinaca amniga. Bishii Febraayo 2024, labada dowladood waxay saxiixeen heshiis qaab-dhismeed oo iskaashi difaac iyo dhaqaale ah, kaas oo sii xoojiyay sannado badan oo Türkiye ay tababar iyo taageero siinaysay ciidamada amniga Soomaaliya.
Ankara waxay sidoo kale qaadatay door diblomaasiyadeed oo ku saabsan Geeska Afrika. Türkiye waxay gacan ka geysatay fududeynta wadaxaajoodyada Soomaaliya iyo Itoobiya, taas oo horseedday Baaqa Ankara ee Diseembar 2024, kaas oo ay labada dal ku xaqiijiyeen ballanqaadkooda ku aaddan ixtiraamka madax-bannaanida iyo wadajirkooda dhuleed.
