Ismariwaagii muddada dheer ka jiray Beled-Hawo ayaa Jimcihii ku soo dhammaaday rasaas la’aan, kaddib markii taliyihii hore ee sirdoonka gobolka Gedo, Cabdirashiid Xasan Cabdi Nuur Janan, uu maamulka Jubaland ku wareejiyay ciidamadii uu hoggaaminayay, sida ay sheegeen mas’uuliyiin, kaddib maalmo wadaxaajood ah.
Janan ayaa subaxnimadii Jimcaha ka dhoofay Mandheera isaga oo raacay diyaarad milatari oo Kenya leedahay kuna sii jeeday Nairobi, kaddib markii heshiiska wareejinta la dhammaystiray.
- Advertisement -
Mas’uuliyiin, oo intooda badan ka tirsan hay’adaha sirdoonka Jubaland, ayaa la wareegay fariisimihii Beled-Hawo ee ay hore u joogeen ciidamo daacad u ahaa Janan.
Ciidamadan ayaa lagu diiwaangeliyay dowladda federaalka Soomaaliya xilligii uu Janan ahaa taliyaha Hay’adda Sirdoonka iyo Nabadsugidda Qaranka ee gobolka Gedo.
Muuqaallo lagu faafiyay baraha bulshada ayaa muujiyay dad rayid ah oo isugu soo baxay inay soo dhaweeyaan ciidamada markii ay galeen degmada.
Bayaan ay soo saartay, maamulka Jubaland ayaa ammaanay odayaasha dhaqanka, haweenka, waxgaradka, dhalinyarada iyo saraakiisha milatariga ee ka qayb qaatay dadaallada nabadeed ee uu sheegay inay ka hortageen daadasho dhiig oo dheeraad ah.
“Dadaallada nabadeed ee lagu xoojinayay amniga iyo xasilloonida degmada Beled-Hawo ee gobolka Gedo ayaa mira dhalay, kaddib markii si nabad ah loo xalliyay xiisaddii dhawaan halkaas ka jirtay,” ayaa lagu yiri bayaanka.
Jubaland ayaa sheegtay in iska horimaadyadii hore ee Beled-Hawo ay sababeen dhimasho, burbur hantiyeed, barakac iyo dhaawac soo gaara xiriirka bulshada dhexdeeda.
“Waxaan bogaadinaynaa bisaylka iyo u heellanaanta nabadda ee ay muujiyeen shacabka Beled-Hawo iyo guud ahaan dadka Jubaland; waxay mar kale caddeeyeen in kala aragti duwanaanta lagu xallin karo wada hadal, isfahan iyo midnimo,” ayaa lagu yiri bayaanka.
Maamulka ayaa sidoo kale u mahadceliyay dhammaan dadkii ku lug lahaa dejinta iska horimaadka, isaga oo sheegay in dadaalkaasi ujeedkiisu ahaa sugidda nabad waarta oo ka hanaqaadda Beled-Hawo.
Wareejintan ayaa Beled-Hawo si buuxda u gelinaysa gacanta Jubaland, kaddib in ka badan sanad xiisad ka jirtay degmada.
Wareejinta ayaa si nabad ah ku dhacday, iyadoo wada hadalku soo afjaray murankii dheeraa halkii uu dagaal cusub ka qarxi lahaa.
Wararku waxay tilmaamayaan in Janan la filayo inuu Nairobi kula kulmo mas’uuliyiinta Jubaland si loo dhammaystiro heshiiskii hordhaca ahaa ee ay labada dhinac gaareen.
