Garowe (AX) — Taliska Mareykanka ee Afrika (AFRICOM) ayaa duqeyn cirka ah ku qaaday bakhaar ay al-Shabab leedahay oo la rumeysan yahay in lagu kaydiyo hubka caadiga ah, kuna yaalla waqooyiga Soomaaliya.
AFRICOM ayaa Jimcihii sheegtay in duqeyntu dhacday 17-kii Sebtembar gobolka Sanaag, qiyaastii 80 kiiloomitir koonfur-galbeed ka xiga Boosaaso.
- Advertisement -
“AFRICOM, iyadoo garab socda Dowladda Federaalka Soomaaliya iyo Ciidamada Qalabka Sida ee Soomaaliya, waxay sii waddaa tallaabooyinka lagu wiiqayo awoodda al-Shabaab ee ay ku hanjabto ciidamada Mareykanka iyo muwaadiniinteenna ku sugan dibadda,” ayuu talisku ku yiri bayaan.
Talisku si degdeg ah uma shaacin in duqeyntu dhalisay khasaare iyo in kale, mana uusan sheegin nooca hubka ku jiray goobta.
Hawlgalku wuxuu ku soo beegmayaa xilli ciidamada Mareykanka iyo Soomaaliya ay sii wadaan dadaallada milatari ee ka dhanka ah al-Shabab, kooxda mintidka ah ee xiriirka la leh al-Qaacida, taas oo weli ka hawlgasha qaybo ka mid ah Soomaaliya.
