Alamein, Masar (AX) — Madaxweynaha Soomaaliya Hassan Sheikh Mohamud ayaa hoggaamiyeyaasha ganacsiga Afrika, shirkadaha caalamiga ah iyo maalgeshadayaasha ugu baaqay inay tixgeliyaan fursadaha ka jira Soomaaliya, isagoo sheegay in dalku dib u dhisayo dhaqaalihiisa isla markaana uu raadinayo iskaashi wax-ku-ool ah.
Wuxuu baaqan jeediyay Sabtidii intii lagu jiray Madasha Ganacsiga Alamein-Africa ee ka dhacday Alamein, Masar, halkaas oo ay isugu yimaadeen madaxda dowladaha, wasiirro, madaxda ganacsiga, maalgeshadayaal iyo wakiillo ka socday hay’adaha maaliyadeed ee daafaha qaaradda.
- Advertisement -
“Soomaaliya ma aha oo keliya dal kasoo kabanaya colaado; waa qaran dib u dhisaya kana habeynaya dhaqaalihiisa,” ayuu yiri Hassan Sheikh. “Waxaan u furan nahay ganacsi iyo maalgashi, waxaanan soo dhoweynaynaa cid kasta oo diyaar u ah inay nala wadaagto geeddi-socodkan dib u dhiska.”
Madaxweynuhu wuxuu khudbaddiisa ku falanqeeyay isbeddellada ka socda muuqaalka dhaqaale iyo siyaasadeed ee caalamka, isaga oo adkeeyay baahida loo qabo iskaashi iyo isdhexgal dhaqaale oo Afrika ka ballaaran.
Wuxuu ugu baaqay dalalka Afrika inay si buuxda uga faa’iideystaan kheyraadkooda dabiiciga ah, awoodda shaqaalaha iyo kartida maalgashi si loo dardargeliyo koboca iyo horumarka.
Hassan Sheikh wuxuu sheegay in maalgashiga wax-soo-saarka ahi uu muhiim u noqon doono abuurista shaqooyin, ballaarinta dhaqaalaha Soomaaliya iyo taageeridda horumar waara.
Wuxuu intaas ku daray in rajada dhaqaale ee Afrika ay ku tiirsan tahay iskaashi dhow, maalgashi sare, ganacsi ballaaran, kaabayaal xooggan iyo suuqyo si badan isugu xiran oo qaaradda oo dhan ah.
Madasha Alamein Africa waxay Jimcihii ka bilaabatay New Alamein, oo ah magaalo ku taalla xeebta waqooyi ee Masar, iyadoo ay ka qaybgaleen ku dhowaad 1,500 oo mas’uul, hoggaamiyeyaal ganacsi, maalgeshadayaal iyo wakiillo ka socday hay’adaha maaliyadeed.
Kulanka oo soconaya saddex maalmood ayaa lagu qabanayaa dooddo heer sare ah oo ku saabsan horumarinta dhaqaalaha iyo isdhexgalka qaaradda.
Ergooyinka ayaa sidoo kale ka hadlaya caqabadaha waaweyn ee horyaalla Afrika, kuwaas oo ay ka mid yihiin helitaanka maalgelin oo xaddidan, yaraanta kaabayaasha, kharashaadka raasamaalka oo sarreeya, isku-xirnaanta suuqyada oo daciif ah iyo caqabadaha sii wiiqaya ganacsiga iyo maalgashiga ka dhex socda dalalka Afrika.
