Weerar mindi loo adeegsaday oo ka dhacay hoteel ay deggan yihiin magangelyo-doonno oo u dhow Garoonka Diyaaradaha Heathrow ayaa sababay in nin da’diisu ku jirto 30-meeyada uu soo gaaro dhaawacyo halis gelinaya noloshiisa, halka boolisku ay xireen nin Soomaali ah oo looga shakisan yahay isku day dil.
London (AX) — Booliska Surrey ayaa sheegay in saraakiil loo yeeray Stanwell Hotel ee ku yaalla Staines qiyaastii 6:30 fiidnimo Sabtidii, kaddib markii ay heleen warar ku saabsan tooreyn.
- Advertisement -
Nin da’diisu ku jirto 30-meeyada ayaa loola cararay isbitaal isagoo ku jira xaalad aad u liidata, sida ay boolisku sheegeen.
Nin Soomaali ah oo da’diisu ku jirto 20-meeyada ayaa loo xiray tuhun la xiriira isku day dil, wuxuuna weli ku jiray xabsiga booliska, sida ay sheegeen Booliska Surrey. Saraakiishu waxay sheegeen inaysan raadinayn qof kale oo la xiriira weerarka.
“Dabeecadda warbixinta awgeed, saraakiil hubeysan ayaa loo diray goobta waxayna gacan ka geysteen qabashada,” ayay tiri Kormeeraha Sare ee Dembi-baarista Kate Hyder.
“Boolis ayaa weli ku sugan aagga inta aan wadno baaritaannada hordhaca ah,” ayay tiri.
Waxay intaas ku dartay: “Waxaan fahamsanahay in dhacdadani walaac ku abuurtay bulshada deegaanka, waxaana idinku dhiirrigelinayaa inaad la hadashaan saraakiisha deegaanka.”
Stanwell Hotel ee Surrey, oo u dhow Garoonka Diyaaradaha Heathrow, ayaa waxaa Adeegga Arrimaha Gudaha ee UK u adeegsaday dejinta magangelyo-doonnada. Boolisku ma shaacin sabab suuragal ah oo ka dambeysa tooreynta mana aysan sheegin in tuhmanaha iyo ninka dhaawacmay ay is yaqaaneen.
Baaritaanku wuu socdaa.
