Samarkand, Uzbekistan (AX) — Soomaaliya ayaa ku biirtay ku dhowaad 100 sharci-dejiye oo ka kala socda 50 dal, kuwaas oo ka qeybgalaya Shirweynaha 12-aad ee Caalamiga ah ee Xildhibaannada Dhalinyarada ee IPU, kaas oo ka socda Samarkand laga bilaabo 4 illaa 6 Sebteembar.
Waxaa qabanqaabiyay Midowga Baarlamaannada Adduunka, kulankani waa madasha ugu weyn ee ururkan u leeyahay sharci-dejiyeyaasha da’da yar.
- Advertisement -
Soomaaliya waxaa matalaya xildhibaan Sadiq Abdullahi Abdi, kaas oo ka qeybgalaya doodaha ay xildhibaannadu diiradda ku saarayaan arrimaha saameeya jiilasha da’da yar.
Ergada ayaa falanqeynaya siyaabaha lagu ilaalin karo xuquuqda aadanaha, lagu horumarin karo nabadda iyo horumar waara, isla markaana lagu xoojin karo awoodda baarlamaannada ee ka jawaabista caqabadaha horyaalla dhalinyarada.
Isagoo shirka ka hadlayay, xildhibaan Sadiq Abdullahi Abdi ayaa carrabka ku adkeeyay baahida loo qabo in la ballaariyo fursadaha dhaqaale ee dhalinyarada. Wuxuu tilmaamay xuquuqdooda dhaqaale, helitaanka shaqo hufan, iyo ka-qeybgal wax-ku-ool ah oo ay ku yeeshaan horumarinta dhaqaalaha.
“Baarlamaannadu waxay leeyihiin door muhiim ah oo ku aaddan dejinta sharciyo iyo siyaasado taageera abuurista shaqooyinka, hal-abuurka ganacsi ee dhalinyarada, horumarinta xirfadaha iyo koboc dhaqaale loo dhan yahay, iyo sidoo kale dardargelinta hirgelinta Yoolalka Horumarka Waara,” ayuu yiri.
Shirka sanadkan waxaa lagu qabanayaa hal-ku-dhegga ah “Dib u soo celinta xuquuqda aadanaha, caddaaladda iyo karaamada qof kasta xilliyo qalalaase leh.”
Ka-qeybgalayaashu waxay sidoo kale ku baaqeen in dhalinyaradu door buuxa ku yeeshaan go’aan qaadashada iyo hindisayaasha horumarineed.
Kulanku wuxuu dib u xaqiijiyay sida ay uga go’an tahay xildhibaannada dhalinyarada ah difaaca xuquuqda aadanaha, horumarinta nabadda iyo ballaarinta fursadaha ka caawin kara dhalinyarada inay dhistaan mustaqbal waara.
