Soomaaliya iyo Pakistan ayaa u dhaqaaqaya inay ballaariyaan iskaashiga ku saabsan aqoonsiga qaranka iyo nidaamyada dowladnimada dhijitaalka ah, iyadoo Muqdisho ay ka shaqaynayso dhismaha kaabeyaasha loo baahan yahay si muwaadiniinta loogu xiro adeegyada dadweynaha.
Hay’adda Aqoonsiga iyo Diiwaangelinta Qaranka ee Soomaaliya (NIRA) ayaa sheegtay in labada dal ay sahaminayaan wada-shaqayn dhow oo ku saabsan nidaamyada aqoonsiga qaranka, diiwaangelinta madaniga ah iyo kaabeyaasha dhijitaalka ah.
- Advertisement -
Hindisahan ayaa ka dambeeyay booqasho ay wafdi Soomaali ahi ku tageen Islamabad, halkaas oo mas’uuliyiintu ay isku dhaafsadeen khibrado la xiriira nidaamyada aqoonsiga, diiwaangelinta madaniga ah iyo horumarinta adeegyada dhijitaalka ah.
Wafdiga waxaa hoggaaminayay Agaasimaha Guud ee NIRA, Cabdiwali Cali Cabdulle (Timacadde), wuxuuna la kulmay mas’uuliyiin ka tirsan Hay’adda Qaranka ee Xogta iyo Diiwaangelinta Pakistan (NADRA), oo uu hoggaaminayo Guddoomiyaheeda, Sarreeye Guud Maxamed Muniir Afsar.
Iyadoo uu fududeeyay Barnaamijka Horumarinta Qaramada Midoobay (UNDP), booqashadani waxay ku dhisan tahay iskaashi u dhexeeya NIRA iyo NADRA oo billowday sannadkii 2018.
Wadahadallada ayaa ka koobnaa isdhexgalka nidaamyada aqoonsiga qaranka iyo adeegyada dowladda iyo kuwa maaliyadeed, hannaan sugan oo xog-wadaagis ah, heerarka iswaafajinta nidaamyada, ilaalinta xogta iyo dadaallada lagu ballaarinayo awoodda farsamo, ayay NIRA sheegtay.
Wakiilka Joogtada ah ee UNDP Pakistan Samuel Rizk iyo Ku-xigeenka Wakiilka Joogtada ah Van Nguyen ayaa sidoo kale ka qayb qaatay kulammada.
Wafdiyadu waxay eegeen tallaabooyin wax-ku-ool ah oo lagu xoojinayo nidaamyada aqoonsiga iyo diiwaangelinta ee labada dal, iyagoo si gaar ah diiradda u saaraya shaqada ay Soomaaliya weli ku waddo horumarinta nidaam aqoonsi qaran.
Wafdiga Soomaalida ayaa sidoo kale la kulmay hay’adaha Pakistan ee u xilsaaran kaabeyaasha dhijitaalka ah, oo ay ku jiraan Wasaaradda IT-ga iyo Isgaarsiinta iyo hay’ado kale oo la xiriira tignoolajiyada.
UNDP ayaa booqashadan ku tilmaamtay qayb ka mid ah iskaashiga ballaaran ee Koonfur-Koonfur, kaas oo dalalka soo koraya ay isku dhaafsadaan waayo-aragnimo iyo khibrad farsamo si loo hagaajiyo gaarsiinta adeegyada aasaasiga ah.
NIRA ayaa sheegtay in casharrada laga soo ururiyay Pakistan ay wax ku biirin doonaan dadaalka Soomaaliya ee lagu dhisayo nidaam aqoonsi oo isku dhafan, kaas oo muwaadiniinta ku xira adeegyada dowladda una adeegaya saldhigga kaabeyaasha dhijitaalka ah ee dalka.
