Muqdisho (AX) — Soomaaliya ayaa hawlgelisay qorshe qaran oo loogu diyaargaroobayo Ebola, kaddib markii Kenya ay sheegtay kiis dibadda laga soo dhoofiyay oo cudurka fayraska Ebola ee Bundibugyo ah, taas oo ku kalliftay dowladda inay adkayso baaritaanka isla markaana isku dubbariddo tallaabooyinka ka hortagga.
Golaha Wasiirrada Soomaaliya ayaa Khamiistii ansixiyay qorshahan, waxayna kormeerkiisa u xil saareen guddi ka kooban lix wasaaradood. Ra’iisul Wasaare Ku-xigeenka Jibriil Xaaji Cabdi ayaa guddoomin doona guddiga, oo ay ku jiraan wasaaradaha u xilsaaran caafimaadka, amniga, arrimaha dibadda, gaadiidka, warfaafinta iyo xoolaha.
- Advertisement -
Wasaaradda Caafimaadka iyo Daryeelka Bulshada ayaa Golaha Wasiirrada uga warbixisay xaaladda Ebola, waxayna sharraxday tallaabooyinka lagu yareynayo halista faafitaanka haddii cudurku soo gaaro Soomaaliya.
Mas’uuliyiintu waxay Khamiistii bilaabeen baaritaanka dadka safarka ah ee ka imaanaya dalalka Afrika, kaddib markii Kenya ay xaqiijisay kiiska dibadda laga soo dhoofiyay.
Wasiirka Caafimaadka Dr. Cali Xaaji Aadan ayaa sheegay in kooxo caafimaad loo diray garoomada diyaaradaha si ay ula socdaan rakaabka ka imanaya guud ahaan qaaradda, iyadoo fiiro gaar ah la siinayo duullimaadyada ka imanaya Kenya oo dariska ah.
“Waxaan garoonka diyaaradaha geeynay koox caafimaad oo la socota duullimaadyada ka imanaya dalalka Afrika. Hadda waxaan sii xoojineynaa diyaargarowgeenna kaddib markii Ebola ay gaartay Kenya,” ayuu yiri wasiirku.
Wasaaradda Caafimaadka Soomaaliya ayaa dadweynaha ugu baaqday inay si joogto ah gacmaha u dhaqaan, kana fogaadaan taabashada dhiigga ama dheecaannada jirka ee dadka xanuunsan.
Dowladdu waxay sheegtay in tallaabooyinkani ay qayb ka yihiin dadaal ballaaran oo lagu xoojinayo awoodda Soomaaliya ee ka jawaabista cudurrada faafa, iyadoo la isku dubbaridayo hay’adaha u xilsaaran daryeelka caafimaadka, amniga, gaadiidka iyo wacyigelinta dadweynaha.
