Arusha, Tanzania (AX) — Guddoomiyaha Baarlamaanka Soomaaliya, Cabdilqaadir Maxamed Nuur, ayaa Jimcihii hoggaamiyey kulankii 21-aad ee Xafiiska Guddoomiyeyaasha Baarlamaannada Bulshada Bariga Afrika (EAC) ee ka dhacay Arusha, halkaas oo xildhibaannadu ku falanqeeyeen siyaabaha loo xoojin karo iskaashiga baarlamaannada iyo isdhexgalka gobolka.
Isaga oo ah guddoomiyaha Xafiiska Guddoomiyeyaasha Baarlamaannada EAC, Cabdilqaadir ayaa sheegay in dooduhu diiradda saareen ballaarinta diblomaasiyadda baarlamaannada, wadaagista khibradaha hay’adaha iyo xaqiijinta in hannaanka isdhexgalku uu shacabka Bariga Afrika oo dhan u horseedo faa’iidooyin wax ku ool ah.
- Advertisement -
Waxa uu ka qaybgalayaasha warbixin ka siiyey horumarka Baarlamaanka 11-aad ee Soomaaliya, isaga oo xusay shaqada la xiriirta dhismaha dowladnimada, dhammaystirka iyo ansixinta Dastuurka, amniga iyo sarreynta sharciga, maamulka maaliyadda dadweynaha iyo horumarinta dhaqaalaha.
Cabdilqaadir ayaa sheegay in Golaha Shacabka uu meel mariyey in ka badan 56 sharci, isla markaana uu ansixiyey 18 qaraar.
“Aragtida Golaha ayaa ah inuu si buuxda u guto waajibaadkiisa dastuuriga ah, gaar ahaan dejinta sharciyada iyo kormeerka, inuu u adeego danaha shacabka Soomaaliyeed, isla markaana uu gacan ka geysto xoojinta iskaashiga iyo isdhexgalka EAC,” ayuu yiri.
Guddoomiyuhu wuxuu sheegay in mustaqbalka EAC uu ku xirnaan doono iskaashi dhow, hay’ado adkaysi leh iyo baarlamaanno wax ku ool ah oo ka tarjumaya danaha iyo himilooyinka muwaadiniintooda.
Waxa uu mar kale xaqiijiyey sida ay Soomaaliya uga go’an tahay inay si buuxda uga qayb qaadato iskaashiga iyo isdhexgalka gobolka.
Cabdilqaadir ayaa sidoo kale xaqiijiyey in Soomaaliya ay diyaar u tahay martigelinta kulanka 22-aad ee Xafiiska Guddoomiyeyaasha Baarlamaannada EAC, kaas oo ka dhici doona Muqdisho dhammaadka Janaayo 2027.
Waxa uu rajo ka muujiyey in kulanka Muqdisho uu sii xoojin doono dadaallada lagu dhisayo Bulsho Bariga Afrika oo mideysan, barwaaqo ah iyo nabad ku naaloota.
Soomaaliya ayaa la wareegtay guddoominta Xafiiska Guddoomiyeyaasha Baarlamaannada EAC bishii Nofeembar 2025, iyadoo xilka kala wareegtay Kenya kaddib muddo hal sano ah oo uu hoggaaminayey Guddoomiyaha Golaha Qaranka Kenya, Moses Wetang’ula.
