Muqdisho (AX) — Golaha Wasiirrada Soomaaliya ayaa ansixiyay hirgelinta Dastuurka dib loo eegay, waxayna guddi wasiirro ah u xilsaareen diyaarinta sharci qeexaya qaab-dhismeedka dowladda, tirada wasiirrada iyo waajibaadka hay’adaha dowladda.
Ra’iisul Wasaare Xamza Cabdi Barre ayaa shir aan caadi ahayn guddoomiyay Arbacadii, kaas oo diiradda lagu saarayay dhaqan-gelinta Dastuurka, horumarinta dadaallada dhismaha dowladnimada iyo xoojinta hay’adaha dadweynaha.
- Advertisement -
Guddiga, oo uu hoggaaminayo wasiirka caddaaladda iyo arrimaha dastuurka, ayaa haysta laba bilood oo uu ku dhammaystirayo hindise-sharciyeed qeexaya qaab-dhismeedka dowladda.
War-saxaafadeed ka soo baxay Xafiiska Ra’iisul Wasaaraha ayaa sheegay in sharciga la soo jeediyay uu go’aamin doono tirada xubnaha dowladda, isla markaana uu caddeyn doono mas’uuliyadaha wasaaradaha iyo hay’adaha kale ee dowladda.
Xafiisku wuxuu tallaabadan ku tilmaamay sharcigii ugu horreeyay ee noociisa ah tan iyo 1968-kii.
Intii uu shirku socday, Xamza wuxuu sheegay in Dastuurku dhaqan galay, isla markaana si tartiib tartiib ah marxalado loogu hirgelin doono.
Wuxuu sidoo kale carrabka ku adkeeyay ujeeddada dowladda ee ah in 2027-ka la qabto doorashooyin heer federaal ah oo qof iyo cod ah.
Hase yeeshee Maamulka Puntland, Jubbaland iyo kooxo badan oo mucaarad ah ayaa diiday Dastuurka dib loo eegay. Waxay ku adkaysanayaan in Dastuurka ku-meel-gaarka ah ee 2012 uu yahay saldhigga sharci ee keliya ee geeddi-socodka siyaasadeed ee Soomaaliya iyo doorashooyinka soo socda.
