Muqdisho (AX) — FBI-da ayaa ku dhawaaqday abaalmarin gaareysa $150,000 oo la siinayo cid kasta oo keenta xog horseedda helitaanka iyo qabashada Fahad Mohamed Nur, oo ah Soomaali-Mareykan looga doon-doonayo eedeymo la xiriira qorshe khiyaano oo xilligii COVID-19 lagu beegsaday barnaamij federaal ah oo nafaqeynta carruurta.
Xeer-ilaaliyeyaashu waxay Nur, 42 jir ah, ku eedeeyeen inuu gacan ka geystay in si khiyaano ah loo helo ku dhawaad $300 milyan oo doollar oo ka tirsan lacagta Barnaamijka Federaalka ee Nafaqeynta Carruurta, isagoo si been ah u sheegay in malaayiin cunto ah la siiyay carruur u baahan.
- Advertisement -
FBI-du waxay sheegtay in Nur uu yahay muwaadin Maraykan ah oo dhalasho qaatay, kana soo jeeda Soomaaliya, isla markaana uu isticmaalay magacyada Nur Abdiwali Hassan iyo Abdiwali Nur Hassan. Mas’uuliyiintu waxay aaminsan yihiin inuu ku sugan yahay Soomaaliya.
Sida ay hay’addu sheegtay, Nur wuxuu lahaa shirkad sahayda cuntada bixisa oo ka heshay barnaamijka in ka badan $5 milyan. Xeer-ilaaliyeyaashu waxay ku andacoonayaan in shirkaddu gudbisay dukumentiyo iyo qaansheegad been abuur ah oo ku saabsan gaarsiinta cunto aan waligeed la geynin goobihii lagu qoray.
Maxkamad federaal ah oo ku taalla Minnesota ayaa soo saartay waaran qabasho oo ka dhan ah Nur 13-kii Sebtembar 2022, kadib eedeymo ay ku jiraan khiyaano maaliyadeed iyo lacag-dhaqid.
Waa mid ka mid ah 79 qof oo ilaa hadda dacwad lagu soo oogay kiiskan. Xeer-ilaaliyeyaashu waxay ku andacoonayaan in eedaysanayaashu lacagaha u leexiyeen dano shakhsiyeed halkii ay ugu adeegsan lahaayeen bixinta cuntooyinka carruurta.
