Dhammaan toddobada shaqaale ee Pakistaniyiinta ahaa ee ka badbaaday weerar burcad-badeed oo ka dhacay xeebaha Soomaaliya ayaa hadda la badbaadiyey, ayuu Isniintii sheegay Wasiirka Arrimaha Dibadda Pakistan, Ishaq Dar.
Burcad-badeed Soomaali ah ayaa dabayaaqadii Abriil qabsaday markabka shidaalka ee MT Honour, oo ku diiwaangashan calanka Palau, qiyaastii 30 mayl-badeed u jirta xeebaha Soomaaliya xilli uu ku sii jeeday Muqdisho. Toban ka mid ah 17-ka shaqaale ee markabka saarnaa waxay ahaayeen muwaadiniin Pakistani ah.
- Advertisement -
Saddexdii qof ee Pakistaniyiinta ahaa ee ugu dambeeyey ee badbaaday ayaa la badbaadiyey, waxaana diyaarad loogu qaaday Addis Ababa, iyaga oo ay weheliyaan mas’uuliyiin ka socday Safaaradda Pakistan ee Jabuuti, ayuu Dar ku sheegay qoraal uu ku daabacay X.
Waxa uu intaa ku daray in la filayo inay Arbacada ka safraan caasimadda Itoobiya kuna tagaan Karachi, iyaga oo raacaya duulimaadka ugu horreeya ee diyaaradda Ethiopian Airlines ee la heli karo.
Afarta kale ee shaqaalaha Pakistaniyiinta ahaa ee ka badbaaday afduubka ayaa la badbaadiyey dabayaaqadii Sebtembar, in ka badan shan bilood kaddib markii markabka la qabsaday.
Waxay Axaddii gaareen Karachi iyaga oo raacay duulimaad Ethiopian Airlines ah oo ka yimid Addis Ababa.
Saddex shaqaale oo Pakistaniyiin ah ayaa lagu dilay weerarka, meydadkoodana sidoo kale waxaa dib loogu celiyey Pakistan.
