Haweeney ku eedaysay Jay-Z inuu kufsaday iyadoo 13 jir ah ayaa hadda sheegtay in eedeymahaasi been ahaayeen isla markaana aysan waligeed la kulmin fannaanka Mareykanka, sida ku cad dukumenti maxkamadeed.
Haweeneyda, oo aan la shaacin aqoonsigeeda, waxay ku eedaysay Jay-Z iyo soo-saaraha hip-hop-ka ee sumcaddiisu xumaatay Sean “Diddy” Combs inay weerareen kaddib xafladdii MTV Video Music Awards bishii Sebtembar 2000.
- Advertisement -
Jay-Z, oo magaciisa dhabta ahi yahay Shawn Carter, ayaa dacwadda ku tilmaamay “sheeko mala-awaal ah.” Haweeneydu waxay 2025 ka laabatay dacwaddii madaniga ahayd ee ay ka gudbisay labada nin.
“Waligay lama kulmin mana aanan la hadlin Mr Carter. Mr Carter waligiis iguma kicin wax dhaqan aan habboonayn,” ayay ku sheegtay dukumentigii ugu dambeeyay ee maxkamadda.
“Waxaan fahamsanahay in eedeymahaygii beenta ahaa ay Mr Carter u geysteen xanuun, rafaad iyo dhaawac aad u weyn oo aan waligii si buuxda loo sixi karin.”
Qareennada Jay-Z ayaa bayaanka gudbiyay iyagoo qayb ka dhigaya dacwad-celis ka dhan ah haweeneyda iyo qareennadeeda. Kiiskaasna hadda sidoo kale waa la joojinayaa.
Haweeneydu waxay sheegtay inay gudbisay cabashadeeda kaddib markii ay aragtay xayeysiis Facebook ah oo raadinayay dad qaba dacwooyin ku saabsan faraxumayn galmo oo ka dhan ah Combs, kaas oo sannadihii u dambeeyay wajahaya eedeymo badan, isla markaana xabsi ugu jira eedeymo dhilleysi.
“Xayeysiisku wuxuu soo kiciyay xusuuso la xiriira in la i kufsaday markii aan 13 jir ahaa,” ayay tiri, iyadoo sharraxaysa inay kaddib la xiriirtay xafiis qareenno.
Waxay sheegtay inaysan xasuusan inay qareennada u oggolaatay inay 2024 gudbiyaan cabashada, waxayna markii dambe ka laabatay kaddib markii ay “shaki” ka qaadday eedeymaheeda.
Dukumentiga qayb ahaan la qariyay ayaa muujinaya in haweeneydu ay la kulantay dhibaatooyin caafimaadka maskaxda ah.
Isha: AFP
