Baydhabo (AX) — Raadinta gabar shan jir ah oo maqneyd ayaa ku dhammaatay musiibo kadib markii meydkeeda laga helay meel u dhow guriga qoyskeeda ee Baydhabo, Dowlad Goboleedka Koonfur Galbeed, sida ay sheegeen booliska iyo eheladeeda.
Ikhlaas Ibraahim Aamiin ayaa la helay galabnimadii dambe ee Jimcaha gudaha xarun caafimaadka hooyada iyo dhallaanka ah oo ku taalla agagaarka guriga qoyskeeda ee xaafadda Xaqsoor, laba maalmood kadib markii ay wayday.
- Advertisement -
Boolisku waxay sheegeen in saddex qof — laba haween ah iyo nin dhalinyaro ah — loo xiray arrintan. Wax dacwado rasmi ah weli laguma soo oogin.
Qoyska Ikhlaas ayaa ku wargeliyay in ay maqan tahay abbaaro 2-dii duhurnimo ee Arbacadii, taas oo keentay in ciidamada ammaanku ay muddo laba maalmood ah ka baaraan Baydhabo iyo deegaannada ku dhow.
Ibraahim Maxamed Aamiin, oo qaraabo ah, ayaa sheegay in qoysku ay arkeen dhaawacyo u muuqday kuwo muujinaya in gabadha la garaacay laguna ceejiyay xarig. Mas’uuliyiintu ma shaacin natiijooyinka baaritaanka caafimaad.
Meydeeda ayaa loo qaaday Isbitaalka Gobolka Bay, halkaas oo dhakhaatiirtu ay baaritaan ku sameynayaan si loo ogaado sababta dhimashada.
Hoggaamiyaha Koonfur Galbeed Sheekh Aadan Maxamed Nuur Madoobe ayaa la sheegay inuu faray booliska iyo hay’adaha sirdoonka inay si degdeg ah u baaraan kiiskan, isla markaana ay daba galaan cid kasta oo lagu helo mas’uuliyadda.
Mas’uul ka tirsan madaxtooyada Koonfur Galbeed ayaa sheegay in Aadan Madoobe uu doonayo in baaritaanka si degdeg ah loo soo gabagabeeyo si qoysku u helaan caddaalad.
Mas’uul boolis ah ayaa sheegay in mid ka mid ah dadka la xiray uu ahaa ilaalo ka shaqaynayay dhismaha laga helay meydka Ikhlaas.
“Baaritaanku wuu socdaa, waxayna isku dayayaan inay si sax ah u ogaadaan waxa ku dhacay gabadha iyo cidda mas’uulka ka ah dhimashadeeda,” ayay boolisku sheegeen.
Qoyska Ikhlaas wuxuu ka mid ahaa qoysas barakacayaal ah oo bishii Luulyo loo raray guryo cusub oo laga dhisay deegaanka Xaqsoor ee Baydhabo.
Qoysku waxay dalbanayaan in si buuxda loo caddeeyo sida Ikhlaas u geeriyootay, in la aqoonsado dadka mas’uulka ka ah, isla markaana dacwad lagu soo oogo dhammaan dadka ku lugta leh.
