Muqdisho (AX) — Dowlad-goboleedka Hirshabelle ayaa 30-ka Sebtembar, 2026 qaban doona doorashooyin isku mar ah oo loogu codeynayo goleyaasha deegaanka iyo Aqalka Wakiillada, sida ay Isniintii ku dhawaaqday Guddiga Madaxa-bannaan ee Doorashooyinka iyo Xuduudaha Qaranka (NIEBC).
Jadwalkan dib loo eegay ayaa beddelaya jadwalkii la shaaciyay 25-kii Luulyo, kaas oo maalinta codbixinta ka dhigayay 20-ka Agoosto.
- Advertisement -
Sida ku cad qorshaha la cusboonaysiiyay, diyaar-garowga codbixinta ayaa bilaaban doona horraanta Sebtembar.
Diiwaanka ku-meelgaarka ah ee codbixiyeyaasha ayaa la filayaa in la daabaco 2-da Sebtembar, waxaana xigi doona aqoonsiga iyo shaacinta goobaha codbixinta 15-ka Sebtembar.
16-ka Sebtembar, guddiga diiwaangelinta ayaa bilaabi doona shaqadiisa, kaararka codbixiyeyaashana waa la bixin doonaa.
Ururrada siyaasadeed ayaa 17-ka Sebtembar gudbin doona liisaska musharraxiinta Aqalka Wakiillada iyo goleyaasha degmooyinka, waxaana isla maalintaas liisaskaas lagu sameyn doonaa hubin.
Guddigu wuxuu daabici doonaa diiwaanka kama dambaysta ah ee codbixiyeyaasha 19-ka Sebtembar.
Codbixintu waxay dhici doontaa 30-ka Sebtembar, 2026.
NIEBC waxay sheegtay in jadwalka dib loo eegay uu ka tarjumayo waajibaadkeeda sharciyeed, oo ay ku jiraan Qodobka 10-aad ee sharciga lagu dhisay guddiga iyo Qodobka 18-aad ee Sharciga Doorashooyinka Qaranka.
Waxay ugu baaqday ururrada siyaasadeed, dadka deggan Hirshabelle iyo dhammaan daneeyayaasha kale ee doorashooyinka inay sameeyaan diyaar-garowga lagama maarmaanka ah si ay uga qayb qaataan geeddi-socodka doorashada.
