Laascaanood (AX) — Wafdi sare oo ka socday Qaramada Midoobay ayaa booqday Laascaanood maalintii Axadda, xilli abaarta sii xumaanaysa iyo barakacu ay kordhinayaan baahiyaha bini’aadantinimo ee ka jira guud ahaan gobolka Sool ee Soomaaliya.
Wafdiga waxaa hoggaaminayay George Conway, ku xigeenka ergayga gaarka ah ee Qaramada Midoobay, isku-duwaha deggenaanshaha iyo gargaarka bini’aadantinimo ee Soomaaliya. Intii uu booqashadu socotay, Conway wuxuu la kulmay Cabdirashiid Yuusuf Jibriil, madaxweynaha ku meel gaarka ah ahna madaxweyne ku xigeenka Maamulka Waqooyi Bari ee Soomaaliya, iyagoo ka wada hadlay iskaashiga u dhexeeya maamulka gobolka iyo Qaramada Midoobay.
- Advertisement -
Jibriil ayaa uga mahadceliyay wafdiga inay yimaadeen Laascaanood, wuxuuna ammaanay taageerada Qaramada Midoobay ee dadaallada bini’aadantinimo iyo horumarineed ee gobolka.
Sool waa mid ka mid ah deegaannada Soomaaliya ee sida ugu daran u saameeyay abaartu. Bulshooyinka ku nool halkaas waxay la daalaa dhacayaan biyo iyo cunto yari, barakac, helitaan xaddidan oo adeegyada caafimaadka ah, iyo hoy iyo badbaado aan ku filnayn.
Conway wuxuu sidoo kale la kulmay qoysas wajahaya baahiyo bini’aadantinimo oo daran. Xafiiska Qaramada Midoobay ee Isku-dubbaridka Arrimaha Bini’aadantinimada ayaa sheegay in gargaarka si degdeg ah loo ballaariyo si loo daboolo xaaladaha kasii daraya.
Wafdiga Qaramada Midoobay ayaa sheegay inuu sii wadi doono wada shaqeynta uu la leeyahay maamulka Waqooyi Bari si wax looga qabto baahiyaha bini’aadantinimo iyo horumarineed ee gobolka oo dhan.
Booqashadan ayaa dhalisay falcelin adag oo ka timid Maamulka Waqooyi Galbeed ee Soomaaliya, kaas oo ku andacoonaya in Sool iyo Sanaag ay ka mid yihiin dhulkiisa.
Wasaaradda Arrimaha Dibadda ee Maamulka Waqooyi Galbeed ee Soomaaliya ayaa sheegtay inay weli ka go’an tahay ka qayb qaadashada gaarsiinta gargaarka bini’aadantinimo ee bulshooyinka u baahan, oo ay ku jiraan dadka ku nool Laascaanood. Hase yeeshee, waxay sheegtay in booqashooyinka masuuliyiinta sare ee Qaramada Midoobay ee deegaannada xasaasiga ah dhinaca siyaasadda iyo amniga ay tahay in lala waafajiyo mas’uuliyiinta Maamulka Waqooyi Galbeed ee Soomaaliya.
“Maamulka Waqooyi Galbeed ee Soomaaliya wuxuu si adag uga go’an yahay fududeynta gaarsiinta gargaarka bini’aadantinimo dhammaan bulshooyinka u baahan, oo ay ku jiraan dadkeenna ku nool Laascaanood,” ayay wasaaraddu tiri.
Wasaaraddu waxay sheegtay in booqashooyinka noocan oo kale ah ay tahay in lagu maro hannaan diblomaasiyadeed oo hore loo dejiyay, ayna ka horreeyaan ogeysiis, wadatashi iyo isku-duwid lala sameeyo dowladda Maamulka Waqooyi Galbeed ee Soomaaliya.
“Dowladdu waxay sii waddaa inay qiimeyso iskaashigeeda soo jireenka ah ee wax-ku-oolka ah ee ay la leedahay Qaramada Midoobay, waxayna mar kale xaqiijinaysaa sida ay uga go’an tahay wadashaqeyn joogto ah oo iskaashi ku dhisan,” ayay wasaaraddu tiri. Waxay intaas ku dartay in habraacyada diblomaasiyadeed ee la dejiyay iyo marinnada isgaarsiinta la ixtiraamo mustaqbalka wada shaqeynta.
Booqashadu waxay timid iyadoo uu jiro muran dhuleed oo muddo dheer ka taagnaa Sool iyo Sanaag, kuwaas oo ay labaduba sheegtaan Maamulka Waqooyi Galbeed ee Soomaaliya iyo Dowlad Goboleedka Puntland. Laascaanood waxaa gacanta ku hayay ciidamo taageersan dowladda federaalka Soomaaliya iyo maamulka Waqooyi Bari tan iyo markii ay ciidamada Maamulka Waqooyi Galbeed ee Soomaaliya ka baxeen magaalada sannadkii 2023, kaddib bilo badan oo dagaal socday.
