Belgrade, Serbia (AX) — Madaxweynaha Soomaaliya Hassan Sheikh Mohamud ayaa Talaadadii ku biiray hoggaamiyeyaasha magaalada Belgrade furitaanka shir-madaxeedka xuska sannad-guurada 65-aad ee Dhaqdhaqaaqa Aan Isbahaysiga Ahayn.
Isagoo la hadlayay kulanka, Hassan Sheikh ayaa iftiimiyay cadaadisyada isa soo taraya ee dhinacyada amniga, siyaasadda iyo dhaqaalaha ee dunida wajahaysa, wuxuuna ku baaqay iskaashi caalami ah oo qoto dheer.
- Advertisement -
“Khilaafaadka, argagixisada, xiisadaha juqraafi-siyaasadeed iyo isbeddelka cimilada ayaa ka mid ah caqabadaha u baahan midnimo iyo tallaabo wadajir ah oo ay qaaddo bulshada caalamka,” ayuu yiri.
Madaxweynaha ayaa sharaxay horumarka ay Soomaaliya samaysay, wuxuuna tilmaamay dadaallada dowladda federaalka ee lagu xoojinayo xasilloonida, lagu horumarinayo dib-u-dhiska, laguna dardargelinayo horumarka qaranka.
Wuxuu sidoo kale muujiyay qaddarinta uu u hayo taageerada joogtada ah ee beesha caalamka ay siiso Soomaaliya.
Hassan Sheikh ayaa mar kale adkeeyay sida Soomaaliya uga go’an tahay mabaadi’da aasaasiga ah ee Dhaqdhaqaaqa Aan Isbahaysiga Ahayn, oo ay ku jiraan ixtiraamka madaxbannaanida iyo wadajirka dhuleed, caddaaladda, sinnaanta iyo xalinta nabadeed ee khilaafaadka.
Shir-madaxeedka sanadkan waxaa lagu qabtay halkudhigga “Dhaxalka Aan Isbahaysiga Ahayn: Casharro ku socda Dunida Maanta.”
Ergada ayaa la filayaa inay ka doodaan sinnaanta madaxbannaanida dowladaha, faragelin la’aanta arrimaha gudaha iyo ballaarinta iskaashiga ganacsi ee ka dhexeeya dalalka soo koraya.
Dhaqdhaqaaqa Aan Isbahaysiga Ahayn ayaa shirkiisii ugu horreeyay ku qabtay Belgrade sanadkii 1961, isagoo isu keenay dalal go’aansaday inay ka madax-bannaanadaan isbahaysiyadii quwadaha waaweyn ee Dagaalkii Qaboobaa.
