Muqdisho (AX) — Khadka taageerada ee dowladda Soomaaliya ayaa helay 187 warbixin oo la xiriira rabshado ka dhan ah haweenka iyo gabdhaha tan iyo markii la bilaabay bishii Nofeembar ee sannadkii hore, taasoo muujinaysa baaxadda kiisaska tacaddiyada ee la soo gaarsiinayo hay’adaha rasmiga ah.
Xildhibaan Ilyaas Sheekh Axmed ayaa tiradan ku dhawaaqay Sabtidii intii uu socday dood baarlamaan oo ku saabsan hindise-sharciga kufsiga, isaga oo sheegay in khadka caawintu uu siiyay haweenka iyo dhibbanayaasha kale ee tacaddiyada marin toos ah oo ay ku soo gudbin karaan dhacdooyinka.
- Advertisement -
Gobolka Banaadir ayaa lahaa saamiga ugu badan ee cabashooyinka, halka inta kale ay ka yimaadeen dowlad-goboleedyada xubnaha ka ah federaalka Soomaaliya.
“Kiisaska la soo sheegay waxay muujinayaan baahida degdegga ah ee loo qabo in la xoojiyo nidaamyada ilaalinta haweenka iyo gabdhaha isla markaana la hubiyo in hay’adaha dowladda ay si dhaqso leh uga jawaabaan cabashooyinka ay soo gudbiyaan dhibbanayaashu,” ayuu raaciyay.
Adeeggan oo loo yaqaan Helpline 116, waxaa dowladda federaalku aas-aastay bishii Nofeembar 2025 si haweenka iyo carruurtu ugu soo sheegaan tacaddiyada iyo rabshadaha. Kiisaska la soo sheego ayaa markaas loo gudbiyaa hay’adaha ay khusayso.
Wasaaradda Qoyska iyo Horumarinta Xuquuqul Insaanka ayaa sheegtay inay ka shaqaynayso ballaarinta ilaalinta iyo taageerada dhibbanayaasha, oo ay ku jiraan gudbinta kiisaska, daryeelka caafimaadka iyo kaalmada sharci.
Dowladdu waxay sidoo kale waddaa sharciyo la xiriira kufsiga iyo faraxumaynta galmada. Hindise-sharciga Kufsiga iyo Dembiyada Galmada ayaa hadda horyaalla Baarlamaanka si loo tixgeliyo.
