Hargeysa (AX) – Saxafiga Soomaaliyeed Cabdiqani Xuseen Abokor Baylood ayaa tan iyo 29-kii Agoosto lagu hayay xabsi iyadoo aan wax dacwad ah lagu soo oogin Dowladda Waqooyi Galbeed ee Soomaaliya, arrintaas oo keentay in Guddiga Ilaalinta Suxufiyiinta (CPJ) uu dalbado in si degdeg ah loo sii daayo.
CPJ ayaa sheegtay in Cabdiqani la xiray kaddib markii uu baahiyay muuqaal wareysi ah oo uu la yeeshay gabyaa Ismaaciil Yuusuf Cabdi, oo loo yaqaan Jiheeye, kaas oo maamulka Dowladda Waqooyi Galbeed ee Soomaaliya ku eedeeyay inay si sharci darro ah dhul ula wareegeen.
- Advertisement -
“Cabdiqani Xuseen Abokor waxa uu ku biiray liis dheer oo saxafiyiin ah oo bilihii u dambeeyay lagu xiray laguna hayay duruufo shaki badan leh Dowladda Waqooyi Galbeed ee Soomaaliya,” ayay tiri Isuduwaha Barnaamijka Afrika ee CPJ, Muthoki Mumo. “Toban maalmood kaddib markii saxafigan la xiray, mas’uuliyiintu wali si rasmi ah maxkamad uguma soo bandhigin eedeymo. Waa inay si aan dib u dhac lahayn u sii daayaan Cabdiqani.”
Wareysiga, oo la daabacay 27-kii Agoosto, Jiheeye wuxuu ku tiriyay gabay uu ugu baaqayo Madaxweynaha Dowladda Waqooyi Galbeed ee Soomaaliya Cabdiraxmaan Maxamed Cabdillaahi inuu soo farageliyo arrin uu gabyaagu ku tilmaamay in si sharci darro ah loogu qabsaday laba dhul oo isaga uu lahaa. Wuxuu uga digay madaxweynaha in habaar uu ku dhici doono haddii aan tallaabo laga qaadin.
Ciidamada ammaanka ayaa Ismaaciil ku xiray Hargeysa maalintii xigtay.
Cabdiqani ayaa la xiray 29-kii Agoosto kaddib markii uu ka jawaabay yeeris loogu yeeray xarunta Waaxda Dembi-baarista, sida uu sheegay qareenkiisa Towakal Ibraahim Maxamed iyo Ururka Suxufiyiinta Dowladda Waqooyi Galbeed ee Soomaaliya (SOLJA), oo ah urur maxalli ah oo u dooda xuquuqda saxaafadda.
Saxafigan, oo wararka ku baahiya boggiisa Facebook, ayaa si kooban uga soo muuqday Maxkamadda Gobolka Maroodi Jeex ee Hargeysa maalintii la xiray. Maxkamaddu waxay amartay in la hayo toddoba maalmood inta ay mas’uuliyiintu baaritaan sameynayaan.
Waxaa loo qorsheeyay inuu mar kale maxkamadda yimaado Sabtidii, balse dhageysigu ma dhicin sababtoo ah maxkamadda lama keenin, sida uu sheegay qareenkiisu.
Towakal ayaa sheegay in sarkaal ka tirsan CID uu si aan rasmi ahayn ugu wargeliyay in mas’uuliyiintu qorsheynayaan inay Cabdiqani ku soo oogaan eedda gefidda sharafta ama haybadda madaxweynaha, taas oo ah dembi ugu badnaan xukunkiisu yahay saddex sano oo xabsi ah, iyo faafinta dacaayad ka dhan ah dowladda, oo ciqaabteedu gaari karto illaa shan sano sida uu dhigayo xeerka ciqaabta.
CPJ ayaa sheegtay in madaxtooyada iyo wasaaradda warfaafinta ee Dowladda Waqooyi Galbeed ee Soomaaliya aysan ka jawaabin codsiyo faallo ah oo loogu diray email. Sidoo kale ururku wax jawaab ah kama helin farriin loo diray taliska booliska.
Dowladda Waqooyi Galbeed ee Soomaaliya waxay ku dhawaaqday inay ka go’day Soomaaliya sanadkii 1991, inkastoo aysan helin aqoonsi caalami ah oo ballaaran.
Sanadkii la soo dhaafay, ururrada u dooda xorriyadda saxaafadda ayaa ku eedeeyay maamulka Dowladda Waqooyi Galbeed ee Soomaaliya inuu kordhiyay xarigga iyo cadaadiska lagu hayo saxafiyiinta iyo shaqaalaha kale ee warbaahinta.
