Rasaas ka dhacday xaflad xaafadeed oo ka dhacday gobolka Georgia ayaa dishay laba qof, halka 35 kale ay ku dhaawacmeen, iyadoo qaar ka mid ah dhibbanayaasha ay xaaladdoodu halis tahay, sida ay sheegeen mas’uuliyiintu.
Shariifka degmada Dooly, Craig Peavy, ayaa shir jaraa’id ka sheegay in laba nin oo da’doodu tahay 21 iyo 23 jir la dilay magaalada Vienna, oo qiyaastii 216km koonfur ka xigta Atlanta.
- Advertisement -
Inta badan dhaawacyada waxaa sababay rasaas, sida ay wariyeyaasha u sheegeen mas’uuliyiinta maxalliga ah iyo kuwa gobolka.
Boqolaal qof ayaa ka qaybgalayay isu imaatinka, oo lagu qabtay gabagabada toddobaadka soo dhoweynta dugsiga sare ee deegaanka, xilliga ay rasaastu dhacday.
Maamulka ayaan weli aqoonsan wax tuhmanayaal ah ama dad dan laga leeyahay, mana shaacin sabab suurtagal ah.
“Ma doonayno inaan ka sii hor qaadno waxa sababay,” ayuu yiri Chris Hosey, oo ah agaasimaha Xafiiska Baarista Georgia.
Dhibbanayaasha dhaawacmay da’doodu waxay u dhaxaysaa 14 ilaa 51 jir, sida ay sheegeen mas’uuliyiintu.
