Tirada dhimashada ee ka dhalatay weerar mintidiin ah oo isugu jiray qarax iyo rasaas oo lagu qaaday xarun boolis oo ku taalla waqooyiga Pakistan ayaa kor u kacday ugu yaraan 31 qof, sida ay sheegeen mas’uuliyiin maxalli ah.
“Ugu yaraan 31 qof, oo ay ku jiraan 16 askari oo boolis ah, ayaa ku dhintay in ka badan 100 kalena way ku dhaawacmeen weerarka mintidiinta ilaa hadda,” ayuu yiri mas’uul, isaga oo ka digay in iska horimaadku uusan weli dhammaan.
- Advertisement -
Weerarku wuxuu billowday galabnimadii Jimcaha markii weeraryahannadu jebiyeen ammaanka xarunta Old Police Lines ee Kohat, oo ah magaalo ay ku nool yihiin qiyaastii 220,000 oo qof kuna taalla gobolka Khyber Pakhtunkhwa (KP) ee Pakistan.
Mas’uuliyiintu waxay sheegeen in gaari walxaha qarxa laga buuxiyay lagu kaxeeyay gudaha xarunta xilli saraakiisha booliska iyo qoysaskoodu ay masaajid ku urursanaayeen salaad.
Xaruntu waxay u shaqeysaa sidii taliska ugu weyn ee booliska degmada, waxaana ku yaalla xafiisyo ay leeyihiin Waaxda La-dagaallanka Argagixisada, Laanta Gaarka ah iyo qaybo kale oo dhowr ah oo booliska ka tirsan.
“Dhowr mintidiin ah ayaa weli ku go’doonsan qaybta Laanta Gaarka ah ee Xarunta Booliska Kohat,” ayuu yiri sarkaal boolis.
“Rasaas isweydaarsi ayaa iyaga iyo ciidamada u dhexeeyay tan iyo xalay goor dambe. Tiradooda saxda ah weli lama oga,” ayuu mas’uulku ku daray.
Mas’uuliyiinta amniga oo kormeeraya goobta qaraxa
Pakistan waxay kororka rabshadaha ee dhawaan ka dhacay guud ahaan gobolka ku eedeysay mintidiin ka hawlgala Afghanistan, eedeymo ay diidday dowladda Taliban.
Khilaafkan ayaa sii xumeeyay xiriirka u dhexeeya dalalka deriska ah, iyadoo Pakistan ay fulisay duqeymo cirka ah oo ay sheegtay inay ku beegsatay bartilmaameedyo mintidiin ah oo ku yaalla gudaha Afghanistan.
Dowladda Taliban iyo Qaramada Midoobay ayaa sheegay in duqeymo Pakistan ay ka fulisay bariga Afghanistan bishii Juun ay dileen daraasiin rayid ah.
