Guddiga Yurub ayaa lagu wadaa inuu berri shaaciyo xirmo maalgelin weyn ah oo loogu talagalay Greenland, iyadoo Yurub ay ku dhaqaaqayso inay sii qoto dheereyso iskaashigeeda dhulkan istaraatiijiyad ahaan muhiimka u ah ee Arctic-ga.
Madaxweynaha Guddiga, Ursula von der Leyen, ayaa soo gaadhay caasimadda Greenland ee Nuuk, iyadoo ay weheliso Ra’iisul Wasaaraha Denmark, Mette Frederiksen.
- Advertisement -
Labada hoggaamiye ayaa lagu wadaa inay berri shir jaraa’id oo wadajir ah la yeeshaan Ra’iisul Wasaaraha Greenland, Jens-Frederik Nielsen.
Bayaan la soo saaray kaddib markii ay timid Nuuk, Madaxweyne von der Leyen waxay tidhi: “Laba sano ka hor, waxaan halkan u imid inaan furo Guriga Yurub.
“Waxaanna idhi waan soo laaban doonaa si aan iskaashigeenna hore ugu sii qaado – waana kan maanta halkan joogo.
“Yurub way fulinaysaa ballanqaadkeeda. Waxaan iskaashigeenna ku ballaarinaynaa dhinacyo cusub, laga bilaabo isku xirnaan ka wanaagsan oo ka degdeg badan iyo tamar nadiif ah ilaa agabka ceeriin ee muhiimka ah. Waxaan abuureynaa fursado cusub, laga bilaabo isku xirnaanta ilaa xirfadaha. Waxaanna maalgelinaynaa waxa muhiimka ah si ay nolosha maalinlaha ah ee dadka u hagaagto, oo ay ku jirto guryo ka wanaagsan.
“Hammiyadan gadaashooda, waxaan dhignay maalgelinta Midowga Yurub – iyadoo la marayo Xirmada Iskaashiga ee sannadkan iyo kan xiga.
“Miisaaniyadda xigta ee Midowga Yurubna, waxaan soo jeedinnay inaan ka badan labanlaabno maalgelintayada Greenland. Sababtoo ah waxaan dhiseynaa iskaashigan muddada dheer.”
Greenland ayaa mar kale soo jiidatay indhaha juqraafi-siyaasadeed tan iyo markii Madaxweynaha Maraykanka Donald Trump uu horraantii sannadkan ku hanjabay inuu jasiiradda xoog ku qabsan doono.
