Muqdisho (AX) — Ciidanka Xoogga Dalka Soomaaliyeed ayaa billaabay baaritaan kaddib markii askari Axmed Shire Xuseen lagu dilay degmada Ceel Baraf ee gobolka Shabeellaha Dhexe, xilli uu fasax ku safrayay, dhacdo dhalisay carro ballaaran oo dadweyne.
War-saxaafadeed la soo saaray Jimcihii, Taliska Ciidanka ayaa xaqiijiyay in Shire uu ka tirsanaa Ciidanka Xoogga Dalka Soomaaliyeed, balse ma uusan bixin faahfaahin ku saabsan sida loo dilay ama cidda ka dambeysay.
- Advertisement -
Taliska ayaa tacsi u diray qoyska, ehelada iyo askarta ay wada shaqayn jireen ee Shire, wuxuuna sheegay in baaritaanka dhacdada uu socdo.
“Ciidanku waxa uu qaadi doonaa tallaabooyin waafaqsan sharciga si wax looga qabto dhacdada loona isla xisaabtamo cid kasta oo ku lug leh,” ayaa lagu yiri bayaanka.
Taliska Ciidanka ayaa sidoo kale adkeeyay baahida loo qabo ilaalinta nafta, karaamada iyo xuquuqda askarta Soomaaliyeed, isaga oo ku tilmaamay ciidanka hay’ad qaran oo u heellan u adeegidda shacabka Soomaaliyeed.
Wararka ayaa sheegaya in Shire iyo laba askari oo kale loo galay weerar gaadmo ah xilli ay fasax ku jireen, iyaga oo u safrayay gobolka Hiiraan si ay u booqdaan qoysaskooda. Kooxda hubaysan ayaa qabatay saddexdooda, balse markii dambe sii daysay laba ka mid ah.
Muuqaal la duubay intii Shire uu afduubka ku jiray ayaa muujinayay isaga oo baryaya in naftiisa loo daayo. Wuxuu sheegay inuu xanuunsanaa oo gaajaysnaa isla markaana uu ku sii jeeday qoyskiisa.
“Abtiyaal, ha i dilina. Waxaan ku sii socdaa qoyskayga anigoo nabad qaba,” ayuu Shire ku yiri muuqaalka.
Dilkiisa ayaa dhaliyay caro weyn oo ka dhalatay guud ahaan Soomaaliya, iyadoo dad badan ay ku tilmaameen fal bahalnimo ah isla markaana ay dalbadeen in cadaaladda la horkeeno kuwii ka dambeeyay.
