Arbaco, Luulyo 22, 2026
Hargeysa (AX) — Mas’uuliyiinta Maamulka Waqooyi Galbeed Soomaaliya ayaa Arbacadii sii daayay fannaan da’yar oo lagu magacaabo Khalid Mohamud Abdillahi, oo si weyn loogu yaqaan Khalid Kamil, kaddib markii uu dhowr toddobaad ku xirnaa xabsi ku yaalla Hargeysa, sida uu sheegay xubin ka tirsan qoyskiisa.
Maxkamad ayaa amartay in Khalid la sii daayo kaddib markii lagu xiray caasimadda Maamulka Waqooyi Galbeed Soomaaliya.
Hay’adaha ammaanka ee Maamulka Waqooyi Galbeed Soomaaliya si cad uma aysan sharraxin sababta loo xiray. Hase yeeshee, qoyskiisa ayaa warbaahinta maxalliga ah u sheegay in xariggu ka dhashay hees uu ka qoray Qudus.
Abdimajid Mohamud Abdillahi, oo ah Khalid walaalkiis, ayaa sheegay in saraakiil sirdoon ay fannaanka ka qabteen gurigiisa Hargeysa, ka hor inta aan loo gudbin Waaxda Dembi-baarista.
Waxa uu sheegay in Khalid markii dambe loo wareejiyay xabsiga dhexe.
“Khalid waxay ka qabteen gurigiisa,” ayuu yiri Abdimajid. “Sirdoonku waxay ku eedeeyeen inuu qaaday hees ku saabsan Qudus oo uusan weli sii deyn.”
AX ayaa isku dayday inay mas’uuliyiinta Maamulka Waqooyi Galbeed Soomaaliya wax ka weydiiso xarigga, balse uma suuragelin inay la xiriirto.
Heesta aan weli si rasmi ah loo sii deyn ayaa haddana ku faaftay baraha bulshada. Waxay muujinaysaa taageerada Qudus, oo ay ku taallo Masjidka Al-Aqsa — oo ka mid ah goobaha ugu barakaysan Islaamka.
Xarigga Khalid ayaa yimid kaddib markii Maamulka Waqooyi Galbeed Soomaaliya uu bishii hore safaarad ka furtay Qudus, lix bilood kaddib markii Israa’iil ay Maamulka Waqooyi Galbeed Soomaaliya u aqoonsatay dal madax-bannaan. Aqoonsigaas ayaa dhaliyay cambaareyn ballaaran.
Maamulka Waqooyi Galbeed Soomaaliya ayaa hore u xiray culimo, odayaal, suxufiyiin iyo dhallinyaro u dhaqdhaqaaqda arrimaha bulshada, kuwaas oo ka soo horjeeday aqoonsiga Israa’iil ee Maamulka Waqooyi Galbeed Soomaaliya ama dhaliilay xiriirka maamulkaasi la leeyahay Israa’iil.
Qaar ka mid ah dadkaas la xiray ayaa markii dambe la sii daayay iyaga oo aan maxkamad la soo taagin.
