Madaxweynaha Isaias Afwerki iyo Madaxweynaha Soomaaliya Hassan Sheekh Maxamuud ayaa maanta magaalada El Alamein ku xoojiyay mowqif siyaasadeed oo ay wadaagaan, iyagoo yeeshay wada-hadallo ballaaran oo dhacay bartamihii subaxnimada, kuna saabsan xiriirka laba geesoodka ah iyo arrimaha loo arko inay muhiim u yihiin labada dal.
Labada Madaxweyne waxay carrabka ku adkeeyeen baahida loo qabo xoojinta jawi siyaasadeed oo ka hortaga ajandayaasha iyo faragelinta dibadda, iyagoo sheegay in jawigaas uu lama huraan u yahay ilaalinta midnimada dhuleed, xasilloonida iyo nabadda Soomaaliya, iyo sidoo kale midnimada shacabkeeda.
- Advertisement -
Madaxweyne Isaias ayaa sidoo kale sheegay in qaab-dhismeedyada maamul federaal ee Soomaaliya iyo dalalka kale ee gobolka ay marar badan ka gaabiyeen inay ka jawaabaan rajada shacabka ee midnimo iyo isku-duubni. Wuxuu xusay in nidaamyada siyaasadeed ee sii xoojiya kala qaybsanaanta dhaqan-dhaqaale, diimeed iyo qowmiyadeed, huriyana dhibaatooyin soo noqnoqda isla markaana albaabka u fura faragelinta shisheeye, ay tahay in lagu beddelo qaab-dhismeedyo maamul oo ku salaysan muwaadinnimo.
Madaxweyne Hassan Sheekh Maxamuud ayaa dhankiisa u mahadceliyay Madaxweyne Isaias Afwerki iyo shacabka Eritrea, isagoo ku tilmaamay mowqifkooda joogtada ah iyo taageerada ay siiyaan Dowladda iyo shacabka Soomaaliya.
Madaxweyne Isaias Afwerki ayaa shalay galab magaalada El Alamein sidoo kale wada-hadallo kula yeeshay Jeneraal Cabdel Fattaax al-Burhaan, Guddoomiyaha Golaha Sare ee Suudaan, kuwaas oo ku saabsanaa xiriirka laba geesoodka ah iyo arrimaha gobolka iyo caalamka ee labada dal ay dan wadaag ka leeyihiin.
Kulanka oo lagu qabtay dhinacyada Shir-madaxeedka Wadatashiga Afarta Dhinac, ayaa qayb ka ahaa wada-tashiyada joogtada ah ee hoggaamiyeyaashu ka yeeshaan xiriirka laba geesoodka ah iyo arrimaha kale ee ballaaran ee ay dan wadaagga ka leeyihiin.
