Agaasimaha Hay’adda Sirdoonka Dhexe ee Mareykanka (CIA) John Ratcliffe ayaa ammaanay kaalinta Masar ee amniga Soomaaliya iyo guud ahaan Geeska Afrika, intii lagu jiray wada-hadallo uu Qaahira kula yeeshay Madaxweynaha Masar Abdel Fattah El-Sisi. Wadahadalladu waxay muujiyeen baahida loo qabo isku-duwidda joogtada ah ee u dhexeysa mas’uuliyiinta Masar iyo Mareykanka ee ku saabsan Soomaaliya, Suudaan iyo amniga badda caalamiga ah.
El-Sisi ayaa mar kale xaqiijiyay taageerada buuxda ee Masar ay u hayso tallaabooyinka lagu xoojinayo amniga iyo xasilloonida Soomaaliya. Waxa uu sidoo kale carrabka ku adkeeyay diidmada Masar ee ku aaddan jebin kasta oo lagu sameeyo madaxbannaanida ama wadajirka dhuleed ee Soomaaliya, kadib aqoonsigii Israel ay siisay Somaliland.
