Aqalka Cad ayaa ka mamnuucay weriyeyaasha CNN, MS NOW iyo Politico, isagoo fulinaya hanjabaaddii Madaxweyne Donald Trump ee ahayd in warbaahintan laga reebo xarunta madaxtooyada.
Urur kasta ayaa si gooni ah u sheegay in kaararkii aqoonsiga saxafiyiintooda laga qaaday subaxii ay yimaadeen Aqalka Cad.
- Advertisement -
Hay’adaha warbaahinta ayaa sheegay inay ka hor iman karaan mamnuucidda, iyagoo ku doodaya inay jebinayso ilaalinta Wax-ka-beddelka Koowaad ee dastuurka, kaas oo dammaanad qaadaya xorriyadda hadalka iyo saxaafad xor ah.
CNN waxay tallaabadan ku tilmaantay “weerar sharci-darro ah” oo lagu qaaday xaqeeda dastuuriga ah ee ay ku qabanayso shaqada saxaafadda iyada oo aan dawladdu faragelin.
MS NOW waxay sheegtay inay “qaadi doonto tallaabo kasta oo lagama maarmaan ah si aan u difaacno xuquuqahayaga Wax-ka-beddelka Koowaad iyo doorka lama huraanka ah ee saxaafadda madaxbannaan ku leedahay dimuqraaddiyaddeenna.”
CNN iyo MS NOW waxay sheegeen inay sii wadi doonaan tebinta maamulka Trump, halka Politico ay sheegtay inay weli ka go’an tahay kooxdeeda weriyeyaasha Aqalka Cad.
Donald Trump oo shalay su’aalo uga jawaabayay weriyeyaasha Xafiiska Oval-ka
Qoraal uu shalay ku daabacay baraha bulshada, Mr Trump wuxuu ku eedeeyay hay’adahaas inay “tebinayaan WARAR BEEN ABUUR AH”, wuxuuna sheegay inaanay “awoodin inay si joogto ah u qoraan ama u tabiyaan SHEEKO MALE-AWAAL AH iyo BEEN marka ay tebinayaan Madaxweynaha Maraykanka.”
Wuxuu intaas ku daray: “Hay’ado kale oo Warbaahinta Wararka Beenta ah ah ayaa xigi doona.”
Markii lagu weydiiyay Xafiiska Oval-ka waxa uu uga jeedo hay’adaha kale, Mr Trump wuxuu tusaale ahaan u soo qaatay New York Times iyo Washington Post, isagoo ku tilmaamay “warar been abuur ah”. Si cad uma uusan sheegin in midkoodna laga mamnuuci doono Aqalka Cad.
New York Times waxay mamnuucidda cusub ku tilmaantay “hanjabaad kale oo aargoosi iyo dastuurka ka hor imanaysa”, waxayna sheegtay inay “garab taagan tahay hay’adaha warbaahinta ee uu madaxweynuhu si caddaalad-darro ah u beegsanayo”.
Washington Post waxay sheegtay in gelitaankeeda Aqalka Cad uu yahay “xaq dastuuri ah oo aan laga gorgortami karin”, waxayna falalka madaxweynaha ku tilmaantay “nooc cad oo cabsi-gelin ah oo loogu talagalay in lagu aamusiiyo tebinta.”
Mr Trump ayaa hore isku dayay inuu weriyeyaasha shaqsiyaadka ah iyo hay’adaha warbaahinta ka reebo munaasabadaha saxaafadda.
Sannadkii hore, wuxuu Associated Press ka saaray kooxdii weriyeyaasha loo xilsaaray tebinta dhaqdhaqaaqyadiisa, kadib markii wakaaladdu diidday inay qaadato magaca uu doorbiday ee Gacanka Mexico, kaddib amarkiisii ahaa in waaxda fulintu ugu yeerto Gacanka Ameerika.
Muddadii xilli-xileedkiisii ugu horreeyay, Aqalka Cad ee Trump wuxuu isku dayay inuu kala noqdo ama hakiyo aqoonsiga weriyaha Playboy Brian Karem iyo weriyaha CNN Jim Acosta. Garsoorayaal federaal ah ayaa markii dambe amray in dib loogu soo celiyo kaararkooda saxaafadeed ee Aqalka Cad.
