Madaxweynaha Maraykanka Donald Trump ayaa cambaareeyay weerarrada cusub ee Ukraine ay ku qaadayso wershadaha sifaynta shidaalka Ruushka, isaga oo ku dooday in duqeymahaasi ay gacan ka geysanayaan sare u qaadidda qiimaha tamarta ee dunida.
Ukraine ayaa beegsatay warshad sifaysa shidaalka Ruushka kaddib markii Madaxweyne Volodymyr Zelensky uu sheegay in Kyiv ay soo afjarayso xabbad-joojin ku saabsan kaabayaasha tamarta — heshiis uu ku dhawaaqay Mr Trump — isla markaana uu dhaliilay diyaar u ahaanshaha madaxweynaha Maraykanka ee raadinta heshiisyo lala galo Moscow.
- Advertisement -
“Waxa keliya ee uu samaynayaa waa inuu sare u qaadayo qiimaha shidaalka adduunka. Hagaag, waxaan u malaynayaa in taasi ay ceeb tahay,” Mr Trump ayaa u sheegay warbaahinta Newsmax kaddib markii Ukraine ay duqeysay warshad sifaysa shidaalka oo ay leedahay Rosneft, kuna taalla koonfur-bari ee Moscow, taas oo gacan ka geysata sahayda caasimadda Ruushka.
“Waxaa jira bartilmaameedyo badan oo aad beegsan kartaan, balse marka aad rasaas ku riddaan wershadaha sifaynta naaftada, halkaas oo laga soo saaro, waad ogtihiin, saliidda naaftada, annaguna waan u baahanahay taas, duniduna way u baahan tahay, markaa isagu adeeg wanaagsan uma qabanayo dunida,” ayuu yiri Mr Trump.
Maamulka Mr Trump ayaa ka shaqeynayay dhexdhexaadinta xabbad-joojin loogu talagalay in lagu soo afjaro dagaalka ka dhashay duullaankii buuxa ee Ruushku ku qaaday Ukraine sannadkii 2022.
Isaga oo la hadlayay Newsmax, Mr Trump ayaa mar kale sheegay inuu aaminsan yahay in Mr Zelensky iyo Madaxweynaha Ruushka Vladimir Putin ay si qoto dheer isu neceb yihiin, xaalad uu sheegay inay ka dhigayso heshiis gaadhista mid adag.
“Anigu taageere weyn uma ihi Zelensky,” ayuu yiri Mr Trump. “Waxaan u malaynayaa in labadooduba ay dhab ahaan jeclaan lahaayeen in arrintu dhammaato, balse waxaan u arkaa Zelensky inuu ka adag yahay Putin marka la la macaamilayo.”
Iyadoo Mr Trump uu Kyiv ku cadaadinayay inay joojiso weerarrada ka dhanka ah xarumaha shidaalka Ruushka, Ukraine waxay sidoo kale la tacaalaysay helitaan xaddidan oo ay u leedahay nidaam dayax-gacmeed oo muhiim u ah isgaarsiinteeda goobta dagaalka iyo hawlgallada diyaaradaha aan duuliyaha lahayn.
Go’aanka ayaa lagu gaaray Aqalka Cad gudaheeda, sida ay sheegeen laba sarkaal oo Maraykan ah iyo sarkaal reer Galbeed ah oo arrinta lagu wargeliyay. Ma aysan sheegin cidda ansixisay amarka ama cidda mas’uulka ka ahayd fulintiisa.
Iyada oo xiriirka Kyiv iyo Mr Trump uu sii kordhayo culayskiisu, Mr Zelensky ayaa kula kulmay Brussels madaxa NATO Mark Rutte, wuxuuna wada-hadallo laba geesood ah oo taxane ah la yeeshay hoggaamiyeyaasha Yurub ka hor intuusan maanta ku biirin shir-madaxeedka Midowga Yurub.
