Laba qof ayaa dhintay, afar kalena weli waa la la’yahay kadib markii qarax dumiyey dhisme la deggan yahay oo ku yaalla Plaka, oo ah degmo si weyn loo booqdo oo ku taalla bartamaha Athens.
Qaraxii shalay ayaa burburka ka dhigay dhismaha laba dabaq ka kooban, kaas oo ku dhow goobo caan ah oo ay ka mid yihiin Acropolis iyo Macbudka Zeus.
- Advertisement -
Saddex qof ayaa dhaawacmay, halka xoogga qaraxu uu waxyeelleeyay guryo, dukaamo iyo gaadiid ku dhowaa. Burbur iyo muraayado jajaban ayaa ku firdhay illaa saddex baloog oo ka fog goobta.
Kooxaha gurmadka oo xiran qalab culus oo ilaalin ah iyo koofiyadaha cas, isla markaana ay wehlinayaan eeyo wax uriya, ayaa raadinayay lamaane waayeel ah oo ku noolaa hal guri iyo afar dalxiise oo deggenaa guri kale.
Dhar iyo agab guri ayaa ku daadsanaa burburka dhexdiisa.
“Howlgalka samatabbixintu ma aha mid sahlan, maadaama qaybta ugu weyn ee dhismuhu duntay, isla markaana ay jirto khatar ku wajahan dhismayaasha deriska ah oo sababo amni dartood loo daadgureeyay,” ayay afhayeenka booliska Constantina Dimoglidou u sheegtay telefishanka dadweynaha ee ERT.
Afarta dalxiise, oo ahaa laba lamaane oo Maraykan ah, ayaa lagu waday inay shalay ka baxaan hoygooda una safraan garoonka diyaaradaha Athens, sida uu sheegay ilo boolis.
Mas’uuliyiintu isla markiiba ma aysan xaqiijin waxa sababay qaraxa ka dhacay xaafadda, oo ay ku badan yihiin hoteellada iyo guryaha kirada muddada-gaaban.
Duqa magaalada Athens Haris Doukas ayaa sheegay in qaraxu ay u badan tahay inuu la xiriiro kaabayaasha gaaska. “Wax aad u xun ayaa qaldamay.”
