Khamiis Luulyo 23, 2026
Booliska ayaa lagu wargeliyey kaddib markii la soo sheegay in nin sitay ‘mindi weyn’ uu dhex orday suuq ku yaalla koonfur-bari London Xuquuqda sawirka: UKNIP/UKNIP
Magangelyo-doon Soomaali ah oo joojiyey qaadashada daawadiisa ayaa Maalinta Xuska toorey ku dilay nin hawlgab ah.
Musse Ali, oo 67 jir ah, ayaa dilay Hilkiah McLeggan oo 77 jir ahaa, wuxuuna dhaawacay Ho Yau iyo Baheru Bartura, suuqa East Street ee Walworth, koonfurta London, 10-kii Nofeembar 2024.
Ali, oo UK yimid 1990 kaddib markii uu codsaday magangelyo siyaasadeed, waxa uu qabaa xanuunka dhimirka ee schizoaffective disorder.
Maxkamadda Old Bailey ayaa Arbacadii ku ridday amar aan muddo lahayn oo isbitaal lagu hayo, kaddib markii uu qirtay dil aan ula kac ahayn sababo la xiriira masuuliyad dhiman, dhaawac ula kac ah iyo haysashada qalab af leh.
Garsoore Nigel Lickley KC ayaa yiri: “Kiiskani waxa uu ku saabsan yahay dhacdooyinkii murugada lahaa ee 10-kii Nofeembar 2024, markii eedaysanaha, Mr Ali, oo isku hubiyey mindi weyn oo jikada ah, uu weeraray saddex qof oo dadweynaha ka mid ahaa.
“Mr Ali xilligaas aad ayuu dhimir ahaan u xanuunsanaa, iyadoo xanuunkiisa muddada dheer hayey uu ahaa sababta ugu weyn ee horseedday dembiyadii argagaxa lahaa ee uu maalintaas geystay, markii uu toorey ku dilay Hilkiah McLeggan, isla markaana uu si xun u dhaawacay Ho Yau iyo Baheru Bartura.
“Naf ayaa luntay, nolol badanina way is beddeshay arrintaas awgeed.”
Ali, oo Britain yimid 1990 kaddib markii uu codsaday magangelyo siyaasadeed, waxa uu qabaa xanuunka dhimirka ee schizoaffective disorder Xuquuqda sawirka: Metropolitan Police/Metropolitan Police
Garsooruhu wuxuu sheegay in falalka Ali ay sababeen “cabsi iyo murugo weyn”, wuxuuna go’aamiyey in “aan wax shaki ah ku jirin” inuu weli yahay qof “khatar ah”.
Maxkamadda ayaa maqashay in Ali uu maalintii weerarka bas ku tegay suuqa, ka hor inta uusan gelin dukaan oo uusan mindi xadin.
Markii hore, dukaanluhu wuxuu rumaysnaa in Ali uu qaatay sigaarrada elektaroonigga ah. Laakiin kaddib markii uu xoog kaga saaray goobta, dukaanluhu wuxuu arkay inuu sitay mindi.
Ali ayaa dabadeed si aan kala sooc lahayn toorey ugu dhuftay saddex qof “waqti aad isugu dhow”.
Mr Yau, oo ahaa dhibbanihii ugu horreeyey, ayaa suuqa dhex marayey markii Ali uu “ku soo orday” oo uu “dhowr jeer toorey ku dhuftay”.
Warbixintiisii markhaatiga, Mr Yau wuxuu ku sheegay in Ali uu u muuqday “qof waalan”, indhihiisuna ay ahaayeen kuwo “aad u kala furan oo cabsi leh”.
Kaddib markii uu weeraray Mr Yau, Ali wuxuu mindida dhererkeedu ahaa 20cm ilaa 25cm ku weeraray Mr Bartura iyo Mr McLeggan, sida maxkamadda loo sheegay.
Wuxuu sidoo kale mindida “la damcay” dad kale oo suuqa ku sugnaa ka hor inta aan hubka laga dhigin.
Mr McLeggan ayaa goobta ku geeriyooday kaddib markii dhaawac mindi ah dhabarka laga gaarsiiyey.
Mr Bartura wuxuu u baahday daaweyn caafimaad oo ballaaran weerarka kaddib, kaas oo u geystay dhaawac qoto dheer oo xabadka ka galay, sida maxkamadda loo sheegay.
Bayaan uu kaga hadlayey saameynta falka uu dhibbanaha ku yeeshay, wuxuu ku sheegay inuusan guriga ka bixi karin taageerada qoyskiisa la’aanteed sababo la xiriira “welwel xad-dhaaf ah, walbahaarka dhaawaca ka dhasha iyo cabsi joogto ah oo ah in mar kale la weeraro”.
Dhakhtarka Ali ayaa maxkamadda u sheegay in eedaysanaha, oo bannaanka seexan jiray, uu qabo nooc “daran oo daaweynta u adkaysta” oo ka mid ah xanuunka schizoaffective disorder.
Wuxuu sheegay in, sida uu qabo, weerarku uusan dhici lahayn haddii Ali uusan xanuunsanayn.
Ehellada murugaysan ee Mr McLeggan ayaa tacsi ay u sameeyeen ku sheegay in weerarku uu noloshooda rogmaday.
Waxay sheegeen in Ali uu “ka xaday qof qaali ah, geesi ah, taageero badan oo jacayl badan markii uu geystay falkan waxashnimada iyo danaysiga leh”.
“Aabbahayagu diyaar uma ahayn inuu tago, annaguna diyaar uma aanan ahayn inaan si naxariis-darro ah ku weyno,” ayay raaciyeen.
