Wakiilka Maraykanka Ilhan Omar oo ka hadlaysa shir jaraa’id 28-kii Janaayo 2026 magaalada Minneapolis [Adam Gray/AP]
Nin ku weeraray Wakiilka Dimuqraadiga ee Maraykanka Ilhan Omar khal tufaax ah intii lagu jiray kulan dadweyne oo ka dhacay Minneapolis ayaa lagu xukumay 14 bilood oo xabsi ah kadib markii uu qirtay dambiga weerarka.
- Advertisement -
Anthony James Kazmierczak, oo 55 jir ah, ayaa Khamiistii hor yimid Garsooraha Degmada Joan N Ericksen, wuxuuna qirtay inuu qorsheeyay weerarkii dhacay 27-kii Janaayo. Wuxuu sheegay inuu beegsaday Omar sababo la xiriira aragtidooda siyaasadeed ee iska soo horjeeda. Kazmierczak waxaa lagu soo oogay dacwad ah inuu weeraray sarkaal Maraykan ah.
Waxa laga jooga ku dhawaad siddeed bilood markii Kazmierczak uu ku booday haweeneyda xildhibaanadda ah, kuna buufiyay isku dar madow oo biyo iyo khal ah oo ku jiray sirinjo. Dareeraha ayaa ku dhacay dharka iyo maqaarka Omar.
Muuqaalka dhacdada ayaa muujinaya Kazmierczak, oo fadhiyay safka hore ee kulanka dadweynaha, isagoo si lama filaan ah uga soo cararaya dhagaystayaasha. Kadib waxaa la maqlayay isagoo qaylinaya, “Waa inaad iscasishaa,” kuna eedeynaya Omar inay “Minnesota kala qaybinayso”.
Kooxda ammaanka Omar ayaa si degdeg ah u xakameysay Kazmierczak, kaasi oo markaas la xiray. Omar ma aysan dhaawacmin waxayna sii wadatay kulankii dadweynaha.
Weerarku wuxuu dhacay xilli Omar ay u ololeyneysay in la tirtiro hay’adda Socdaalka iyo Kastamyada (ICE), isla markaana ay ku baaqaysay in ay iscasisho xoghayihii markaas ee Wasaaradda Amniga Gudaha (DHS), Kristi Noem. Omar waxay dhaliishay qaabka Noem u maareysay saraakiisha federaalka ee xuduudaha ee Minneapolis intii lagu jiray toogashooyinka lala xiriiriyay “Operation Metro Surge”, olole ballaaran oo madaxweyne Donald Trump uu ka waday Minnesota oo lagu xoojinayay tallaabooyinka federaalka ee socdaalka. In ka badan 2,000 oo sarkaal ayaa la geeyay Minneapolis iyo Saint Paul, taas oo dhalisay rabshado shacab oo xooggan iyo dhimashada laba muwaadin oo Maraykan ah, Renee Nicole Good iyo Alex Pretti, oo ay dileen saraakiil federaal ah.
Dhageysi hore, Kazmierczak wuxuu sheegay inuusan si cad u xasuusan karin weerarka.
“Xusuustu way igu qasan tahay,” ayuu u sheegay Garsooraha Maraykanka Ericksen markii la weydiiyay waxa uu xasuusto.
Warqad xusuusin ah oo xukunka ku saabsan oo loo gudbiyay maxkamadda, dacwad-oogayaasha ayaa sheegay in Kazmierczak uu ugu yaraan saddex qof u diray farriimo qoraal ah oo muujinaya in weerarka hore loo sii qorsheeyay. Wuxuu diiday inuu ka jawaabo su’aalaha ku saabsan ujeeddadiisa gaarka ah.
Wuxuu sidoo kale la xiriiray deris si uu u sameeyo qorshe daryeel loogu diyaarinayo eeygiisa, wuxuuna helay xog ku saabsan shirkad dammaanad sii-dayn ah.
Qoraalka xukunka ayaa sheegay in Kazmierczak uu lahaa taariikh dheer oo khamri-cabbis xad-dhaaf ah iyo “taariikh walaacyo caafimaadka maskaxda iyo dareenka ah”. Waxa kale oo lagu xusay dhibaatooyin caafimaad oo badan oo la xiriira cudurka Parkinson’s oo laga helay 2022-kii. Qareenkiisa, John Fossum, ayaa ku dooday in Kazmierczak uu joojiyay qaadashada daawadiisa caafimaadka maskaxda ka hor weerarka, taas oo hoos u dhigtay isxakamayntiisa kana qayb qaadatay dhacdada.
“Waxaan waqti ku filan ku qaatay xabsiga anigoo ka fekeraya,” ayuu Kazmierczak sheegay Khamiistii. “Runtii waan ka raalli gelinayaa iyada inaan u geystay waxaasi,” ayuu ku daray, isaga oo ula jeeday Omar.
Farriin uu diray weerarka kadib, Kazmierczak wuxuu Omar u qoray: “Waan ka xumahay haddii aan ku cabsi geliyay.”
Qoraallo uu ku baahiyay baraha bulshada, Kazmierczak wuxuu ku weeraray madaxweynihii hore Joe Biden, wuxuuna Dimuqraadiyiinta ku tilmaamay “dad xanaaqsan oo beenaalayaal ah”. Wuxuu sidoo kale qoray in Trump uu doonayay in Maraykanku noqdo “mid ka xoog badan oo barwaaqo badan”.
“Weerarkan waa tusaale kale oo muujinaya isbeddel qaran oo khatar ah: dad u beddelaya nacaybka siyaasadeed falal dembiyeed,” ayuu Xeer-ilaaliyaha Maraykanka Daniel N Rosen sheegay kadib markii Kazmierczak uu qirtay dambiga bishii May.
Omar, oo ah qaxooti Soomaali-Maraykan ah iyo muwaadin Maraykan ah oo jinsiyadda qaatay, ayaa intii ay Kongareeska ku jirtay bartilmaameed u ahayd jees-jees joogto ah iyo hadallo ka dhan ah soo-galootiga oo uga imaanayay Trump.
