Haweeney British ah oo lagu afduubtay Malawi ku dhowaad toddobaad ka hor ayaa lagu badbaadiyey howlgal booliis oo lagu dilay afar qof oo looga shakisan yahay afduub, isla markaana uu ku dhaawacmay sarkaal sare.
Nusrat Osman, oo 47 jir ah, ayaa la sii daayey Khamiistii intii uu socday howlgal ka dhacay duleedka magaalada Blantyre, ee koonfurta Malawi, sida booliisku sheegeen.
- Advertisement -
Saraakiishu waxay rasaas isweydaarsadeen tuhmanayaasha, kuwaas oo la sheegay inay wateen qori AK-47 ah iyo bastoolad.
“Dambiilayaasha waa la toogtay, waxaana loola cararay isbitaalka halkaas oo ay ugu geeriyoodeen dhaawacyadii soo gaaray,” ayay Malawi Police Service ku tiri bayaan.
Ku-xigeenka Kormeeraha Guud ee Booliiska Noel Kayira, oo ka qeyb qaatay howlgalka, ayaa sidoo kale la toogtay. Waxa uu ku jiraa daaweyn isbitaal, xaaladdiisuna waa deggan tahay, sida lagu sheegay bayaanka booliiska.
Osman ayaa dib ula midoowday qoyskeeda kadib badbaadinta, ka hor inta aan isbitaal loo qaadin si loo daweeyo looguna sameeyo qiimeyn caafimaad oo jir iyo maskaxeed, sida warbaahinta maxalliga ah sheegtay.
Walaalkeed ka yar, Shobi Jiwa, ayaa uga mahadceliyey booliiska Malawi inay guriga kusoo celiyeen. Isagoo la hadlayay wargeyska The Sun ee UK, wuxuu sheegay in qoysku si weyn ugu mahadcelinayaan shaqada ciidanka ee baaritaanka afduubka.
Jiwa ayaa sidoo kale ammaanay Kayira, isagoo taliyaha booliiska ee dhaawacmay ku tilmaamay “halyeyga” qoyska, maadaama uu naftiisa u haligay howlgalka lagu badbaadinayay Osman.
Booliisku ma shaacin aqoonsiga afarta tuhmanaha ah ee lagu dilay weerarka, mana aysan sharxin sida saraakiishu ku heleen raadkooda.
Afar nin oo aan la aqoonsan ayaa Osman ka afduubtay xaafadda Mount Pleasant ee Blantyre 11-kii Sebtembar.
Sida booliisku sheegeen, waxay gurigeeda u wadatay gaari markii nimanku xannibeen gaadhigeeda, ku qasbeen inay raacdo baabuur kale, kadibna ay kaxeysteen.
Afduubku wuxuu sababay baadi-goob ballaaran. Mas’uuliyiintu waxay bixiyeen 30 milyan oo kwacha Malawi ah ($17,000; £12,500) oo abaalmarin ah, si loo helo xog horseedda badbaadinta Osman iyo xarigga iyo xukunka dadka mas’uulka ka ah.
Osman waxay ka soo jeeddaa Leicester ee UK, balse waxay Malawi ku noolayd dhowr sano, halkaas oo ay uga shaqeyso shirkad hanti-dhawr ah. Way xaas tahay waxayna leedahay laba carruur ah oo yaryar.
Wasaaradda Arrimaha Dibadda ee UK ayaa hore BBC ugu sheegtay inay ka war haysay warbixinno sheegaya in muwaadin British ah lagu afduubtay Malawi, ayna xiriir la lahayd mas’uuliyiinta maxalliga ah.
Kiiskan ayaa wareer geliyey baarayaasha, sababtoo ah booliisku waxay sheegeen inaan la soo sheegin wax dalab madaxfurasho ah ama xiriir kale oo ka yimid afduubayaasha kadib markii Osman la waayey.
Qoyskeeda ayaa sameeyey baaqyo dadweyne oo qiiro leh oo ay ku dalbanayaan in si nabad ah loo soo celiyo, iyagoo ku tilmaamay waayitaankeeda mid aad u murugo badan, kana codsaday cid kasta oo xog haysa inay la xiriirto booliiska.
Afduubka ayaa sidoo kale walaac geliyey ganacsatada Malawi iyo muwaadiniinta British-ka ah ee ku nool dalka ku yaalla koonfurta Afrika, halkaas oo afduubyada ay ku lug leeyihiin ajaanibtu ay yihiin kuwo aan badnayn.
Booliisku ma shaacin sabab suurtagal ah, mana aysan sheegin inay ka shaki qabaan in dad kale ku lug lahaayeen afduubka.
Waxay sheegeen in baaritaannadu sii socdaan si loo ogaado duruufaha buuxa ee afduubka iyo howlgalka horseeday badbaadinta Osman.
Mas’uuliyiintu waxay dadweynaha ugu baaqeen inay isdejiyaan inta baaritaanku socdo.
