Arbaco, Agoosto 5, 2026
Mas’uuliyiinta Yemen ayaa masaafuriyay wakiilka ganacsiga ee Dawladda Waqooyi Galbeed Soomaaliya, Idris Aden Raage, kadib markii in ka badan laba bilood lagu hayay magaalada dekedda ah ee Cadan ee koonfurta dalka, sida ay Arbacadii sheegeen ilo Yemeniyiin ah iyo warbaahinta Soomaalida.
Raage ayaa laga sii daayay xabsiga, kaddibna waxaa laga dhoofiyay Garoonka Caalamiga ah ee Cadan isaga oo raacay diyaarad ay leedahay Air Djibouti, sida ay wararku sheegayaan.
Dowladda Yemen si cad uma shaacin sababta loo xiray ama loo masaafuriyay Raage.
Ciidamada ammaanka ayaa Raage xiray 13-kii Juun, kadib markii ay weerareen xafiiska ganacsiga ee Dawladda Waqooyi Galbeed Soomaaliya ku leedahay degmada Khormaksar ee Cadan. Xafiiska ayaa halkaas u guuray kadib markii uu markii hore ka hawlgeli jiray Sanca.
Xarigga ayaa la sheegay inuu la xiriiray munaasabad uu Raage abaabulay 18-kii Maajo si loogu xuso Maalinta Gooni-isu-taagga Dawladda Waqooyi Galbeed Soomaaliya. Warbaahinta maxalliga ah ayaa sheegtay in kulankaasi uusan haysan oggolaansho rasmi ah, ayna ka qaybgaleen xubno ka tirsan Golaha Ku-meelgaarka Koonfureed ee Yemen (STC), oo ah koox ay taageerto Imaaraadka Carabta, isla markaana maamusha qaybo badan oo ka mid ah koonfurta Yemen.
Xildhibaan Guled Mohamed Warsame oo ka tirsan Dawladda Waqooyi Galbeed Soomaaliya ayaa sheegay in mas’uuliyiintu la wareegeen qalab iyo hanti kale oo taalay xafiiska ganacsiga intii uu Raage xirnaa. Wuxuu sheegay in wakiilka la masaafuriyay isla markii la sii daayay.
Ilaa Arbacadii, mas’uuliyiinta Dawladda Waqooyi Galbeed Soomaaliya iyo dowladda Yemen midkoodna kama soo saarin kiiskan bayaan rasmi ah.
Dawladda Waqooyi Galbeed Soomaaliya ayaa sannado badan xafiis ganacsi ku lahayd Yemen si uu u taageero xiriirrada ganacsi iyo diblomaasiyadeed ee ka gudba Gacanka Cadan. Hase yeeshee, Yemen, sida beesha caalamka inteeda kale, waxay aqoonsan tahay madaxbannaanida Soomaaliya, mana aqoonsana Dawladda Waqooyi Galbeed Soomaaliya inay tahay dal madax-bannaan.
