Khamiis, Luulyo 23, 2026
Muqdisho (AX) — Soomaaliya ayaa si adag u cambaareysay hanjabaadaha kooxda Xuutiyiinta Yemen ee ka dhanka ah Sacuudi Carabiya, iyadoo ka digtay in falalka lagu bartilmaameedsado maraakiibta ay khatar gelinayaan ammaanka badaha, xuquuqda isu-socodka iyo ganacsiga caalamka.
Bayaan la soo saaray Arbacadii, Wasaaradda Arrimaha Dibadda iyo Iskaashiga Caalamiga ah ee Soomaaliya ayaa sheegtay in dowladda federaalku ay weli ka go’an tahay ilaalinta madax-bannaanida, amniga iyo wadajirka dhuleed ee dhammaan dowladaha, iyo dhowrista sharciga caalamiga ah.
Jawaabtan ayaa timid kaddib markii Xuutiyiinta xulafada la ah Iran ay sheegeen inay weerareen laba booyadood oo shidaal oo Sacuudi Carabiya leedahay, kuwaas oo marayay Badda Cas.
“Waxaan bartilmaameedsannay laba booyadood oo shidaal oo Sacuudi Carabiya leedahay, laguna kala magacaabo Encelia iyo Layla, sababo la xiriira inay jebiyeen go’aanka xannibaadda ee ay soo saareen ciidamada qalabka sida,” ayuu afhayeenka militariga Xuutiyiinta Yahya Saree sheegay Arbacadii.
Wakaaladda Wararka Sacuudiga, oo soo xiganaysa sarkaal ka tirsan Hay’adda Guud ee Gaadiidka Sacuudi Carabiya, ayaa sheegtay in Encelia la duqeeyay. Dhammaan shaqaalaha markabka ayaa la sheegay inay badqabaan.
Wakaaladdu ma aysan bixin macluumaad dheeraad ah oo ku saabsan weerarka la sheegay in lagu qaaday Layla.
Saree ayaa sheegay in hawlgallada loo adeegsaday gantaallada ballistic-ga, gantaallada ridada dheer iyo diyaaradaha aan duuliyaha lahayn, isagoo ku andacooday inay dab ka kiciyeen maraakiibta dushooda.
Waxa kale oo uu ku andacooday in ku dhowaad 10 markab lagu qasbay inay dib u laabtaan oo ay ka tanaasulaan marinnadii ay qorsheeyeen.
Xuutiyiinta, oo si rasmi ah loo yaqaan Ansar Allah, ayaa 20-kii Luulyo ku dhawaaqay waxa ay ugu yeereen xannibaad badeed oo lagu soo rogay Sacuudi Carabiya.
Ku dhawaaqistaas ayaa timid xilli ay dib u soo cusboonaadeen xiisadaha Yemen, kaddib markii dowladda Yemen ay duqeysay garoonka diyaaradaha Sanca, oo ay Xuutiyiintu gacanta ku hayaan, si looga hor istaago diyaarad Iran laga leeyahay inay halkaas ku degto.
Kooxdu waxay sheegtay in xannibaaddeedu ku salaysan tahay mabda’a “il il baa loo gooyaa,” iyadoo ku doodday inay xaq u leedahay inay xannibaad kaga jawaabto xannibaad kale.
Xuutiyiinta, oo la wareegay gacan-ku-haynta Sanca sannadkii 2014, ayaa hoggaamiyeyaasha Sacuudi Carabiya ku eedeeyay inay ku dhowaad 12 sano sii wadeen go’doomin aan caddaalad ahayn, isla markaana ay xaddideen dekedaha iyo garoomada diyaaradaha Yemen dhinacyada dhulka, badda iyo cirka.
Soomaaliya ayaa sheegtay in hanjabaad kasta oo ka dhan ah ammaanka maraakiibta iyo xorriyadda isu-socodka ay xasillooni-darro ka abuuri karto gobolka, isla markaana carqaladeyn karto ganacsiga caalamiga ah, gaar ahaan marinnada Badda Cas iyo Gacanka Cadmeed, oo ka mid ah marinnada badeed ee ugu muhiimsan dunida.
