Lix Hindi ah ayaa ka mid ah 10-ka shaqaale ee saarnaa markab xamuul oo sita calanka Cameroon, kaas oo ay burcad-badeed ku qabsadeen meel ka baxsan xeebaha Dowlad Goboleedka Puntland horraantii toddobaadkan. (Sawir Fayl ah)
Sida uu sheegay sarkaal Soomaaliyeed, burcad-badeeddu waxay markabka MV LUTUF afduubteen Isniintii, kadibna waxay u jiheeyeen dhinaca xeebaha Nugaal ee Soomaaliya. Markabku waxa uu siday hub Turki ah, qalab isgaarsiineed iyo agab dayax-gacmeed.
- Advertisement -
Shaqaaluhu waxay ka koobnaayeen lix Hindi ah, hal muwaadin oo Turki ah, hal muwaadin oo u dhashay Georgia iyo laba waardiye amni oo Serbian ah.
Sarkaalku wuxuu u sheegay Associated Press in markabka lagu qabsaday qiyaastii 3.5 mayl-badeed u jirta Marraya ee Dowlad Goboleedka Puntland, ka hor intii aan loo kaxayn dhinaca Nugaal. Waxaa la sheegay in siddeed burcad-badeed ahi ay fuliyeen weerarka. Waxaa la rumeysan yahay inay ka tirsan yihiin koox lala xiriirinayo afduubkii markab kale bishii Abriil.
Hubka ayaa la sheegay inuu ku wajahnaa xarun tababar ciidan oo Turki ah oo ku taalla Muqdisho. Xamuulka waxa kale oo ku jiray qalab isgaarsiineed iyo qalab dayax-gacmeed.
Mas’uuliyiinta Turkiga si degdeg ah ugama ay jawaabin dhacdadan. Wasaaradda Arrimaha Dibadda ee Hindiya sidoo kale ma aysan soo saarin wax bayaan ah ilaa subaxnimadii Jimcaha.
Markabka MV LUTUF waxaa iska leh shirkadda Polar Movement Shipping, waxaana markii ugu dambeysay laga diiwaangeliyey Bariga Afrika. Markabku wuxuu dhererkiisu yahay 76.43 mitir, ballaciisuna waa 12 mitir.
16 Hindi ah oo saarnaa markab laga afduubtay meel u dhow Yemen
Dhacdo kale oo gooni ah, booyad shidaal oo sita calanka Eritrea, kana shaqaynaysay qaadista waxyaabaha shidaalka ah, kuna sidday 16 Hindi ah, ayaa lagu afduubtay Gacanka Cadmeed.
M T Sibu 1, oo wadartoodu ahayd 20 shaqaale ah, ayaa waxaa qabsaday burcad-badeed hubeysan 20-kii Agoosto, qiyaastii 30 mayl-badeed u jirta xeebaha Yemen, sida ay werisay wakaaladda wararka ee PTI iyadoo soo xiganaysa mas’uuliyiin.
