Israa’iil ayaa diidday inay ka baxdo qaybo dheeraad ah oo ka tirsan koonfurta Lubnaan ilaa ciidamada Lubnaan ay ka muujiyaan inay si buuxda gacanta ugu hayaan labada “aag tijaabo” ee ugu horreeya, sida uu sheegay ilo-wareed ka tirsan madaxtooyada Lubnaan kaddib wadaxaajoodyo ka dhacay Rome.
Wareeggii toddobaad ee wadahadallada uu Maraykanku taageerayo ayaa Lubnaan iyo Israa’iil isu keenay dadaal lagu doonayo in lagu soo afjaro colaadda u dhexeysa Israa’iil iyo Hezbollah, taas oo furtay furin labaad oo ka mid ah dagaalka ballaaran ee Bariga Dhexe.
Ilo-wareedka Lubnaan, oo codsaday inaan magaciisa la sheegin, ayaa sheegay in wada-xaajoodyadu “aanay keenin natiijooyin kama dambays ah oo ku saabsan aagagga tijaabada”.
Qiimayntaas ayaa ka duwanayd aragtida wanaagsan ee Washington, halkaas oo afhayeen u hadlay Wasaaradda Arrimaha Dibadda Maraykanka uu wadahadallada ku tilmaamay kuwo “wax-ku-ool ah”.
Ciidamada Lubnaan ayaa 21-kii Luulyo bilaabay inay isku fidiyaan tuulo ku taalla koonfurta, taas oo duleedkeedu weli ku jiray gacanta ciidamada Israa’iil, laguna asteeyay mid ka mid ah labadii “aag tijaabo” ee ugu horreeyay. Ciidamadu waxay sidoo kale xoojiyeen joogitaankooda aagga labaad.
“Lubnaan waxay doonaysaa in loo gudbo aagag cusub, halka dhinaca Israa’iil uu ku adkaysanayo in marka hore la xaqiijiyo (hirgelinta ka socota) labada aag ee hore ka hor inta aan loo gudbin marxaladda xigta,” ayuu yiri ilo-wareedka Lubnaan.
Sarkaalka Maraykanka ayaa yiri: “Labada dhinac waxay aad isugu soo dhowaadeen waxa loo baahan yahay in la sameeyo si hore loogu dhaqaajiyo loona ballaariyo hannaanka aagagga tijaabada.”
Ilo-wareedka Lubnaan ayaa intaas ku daray in dhinacyadu ay isku raaceen “liis kooban” oo dalal ah kuwaas oo kormeeri kara hirgelinta heshiiska.
Sarkaal Israa’iili ah ayaa ka digay in ballaarinta qorshuhu aanay ahayn wax “si toos ah u dhacaya”, isla markaana ay ku xirnaan doonto in dowladda Israa’iil ay aragto natiijooyin muuqda.
“Maaddaama tijaabadu bilaabatay qiyaastii laba toddobaad oo keliya ka hor, weli waa xilli hore in la qiimeeyo waxqabadkeeda. Sidaas darteed, marxaladdan ma jirto filasho degdeg ah oo ah in la ballaarin doono,” ayuu yiri sarkaalku.
Qorshaha aagagga tijaabadu wuxuu yahay tijaabadii ugu horreysay ee wax-ku-ool ah ee heshiiska qaab-dhismeedka.
Si kastaba ha ahaatee, Hezbollah ayaa marar badan ka soo horjeesatay wadaxaajoodyo toos ah, waxayna weli diiddan tahay baaqyada ah inay hubkeeda wareejiso.
Intii ay wadahadalladu socdeen, ciidamada Israa’iil ayaa duqeymo ka fuliyay koonfurta Lubnaan, iyagoo ku tilmaamay aargoosi ka dhashay dhimashada laba askari oo shalay ku dhintay qarax.
Hezbollah ayaa bishii Maarso Lubnaan ku lug gelisay dagaalka Bariga Dhexe, iyadoo gantaallo ku ridday Israa’iil si ay u taageerto xulafadeeda Iran.
Israa’iil ayaa kaga jawaabtay duqeymo cirka ah oo xooggan iyo duullaan dhulka ah, kuwaas oo Lubnaan ay sheegtay inay ku dhinteen in ka badan 4,300 oo qof.
Tan iyo markii uu billowday dagaalka Lubnaan, ciidamada Israa’iil waxay waayeen 40 askari iyo hal qandaraasle rayid ah.
