Koonfur Afrika ayaa si adag u diidday dacwad ay laba muwaadin oo u dhashay Ghana u gudbiyeen Maxkamadda Caalamiga ah ee Dambiyada, taas oo lagu dalbanayo baaritaan ku saabsan rabshadaha ka dhanka ah muhaajiriinta ajaanibta ah. Waxay tallaabadaas ku tilmaantay “mid dano gaar ah laga leeyahay”, iyadoo ku adkaysatay in maxkamadaheeda ay awood u leeyihiin inay wax ka qabtaan dambiyada noocaas ah.
Dacwadda loo gudbiyey maxkamadda fadhigeedu yahay Hague ayaa sheegaysa in weerarradu ay noqon karaan dambiyo ka dhan ah aadanaha, waxayna ku eedaynaysaa mas’uuliyiinta Koonfur Afrika inay ku guuldarraysteen joojinta rabshadaha ama inay dembiilayaasha la xisaabtamaan. Rabshadaha iyo bannaanbaxyadii dhowaan looga soo horjeeday muhaajiriinta ayaa kumannaan ajaanib ah ku qasbay inay dalka ka baxaan. Dhowr dowladood oo Afrikaan ah iyo urur-goboleedka Ecowas ayaa cambaareeyey weerarrada.
Pretoria ayaa beenisay in rabshaduhu ay ka tarjumayaan ajaanib-nacayb, waxayna sheegtay inay weli ka go’an tahay sarreynta sharciga. Waxay sidoo kale ku baaqday wada-hadallo ballaaran oo Midowga Afrika uu ka yeesho arrimaha horseedaya socdaalka qaaradda oo dhan. Madaxweyne Cyril Ramaphosa ayaa qiray walaaca ay dadweynuhu ka qabaan socdaalka, balse wuxuu cambaareeyey weerarrada lagu hayo muhaajiriinta, isagoo uga digay dadka Koonfur Afrika inay sharciga gacmahooda ku qaataan.
