Xiddiga da’da yar ee Barcelona Ansu Fati ayaa jabiyay rikoodh kale ooi gooldhalin ah isagoo noqday xiddigii ugu da’da yaraa abid ee gool ka dhaliya El Clasico.
17 jirkaan ayaa dhaliyay goolka barbaraha kooxda Barcelona ee kulanka haatan ka socda Camp Nou isagoo jabiyay rikoodh uu hore u hayay halyeeyga Real Madrid Raul Gonzalez.
181 kulan oo la ciyaaray El Clasico horyaalka La Liga Ansu Fati ayaa ah xiddiga ugu da’da yar ee abid shabaqa soo taabtay isagoo goolka maanta dhaliyay iyadoo da’diisa ay tahay 17 sanno iyo 359 maalmood.
Wuxuu jabiyay rikoodhkii Raul kaasoo El Clasico gool ka dhaliyay isagoo da’diisa ay aheyd 18 sannadood iyo 95 maalmood.
Ansu Fati ayaa dhalashadiisa 18aad u dabaaldegaya isbuuca soo socda, wuxuuna goolkaan u yahay hadiyad xilli hore ah.
Da’ yarkaan wacdaraha dhigaya ayaa durbba xaqiijistay rikoodhka xiddigii ugu da’da yaraa ee gool u dhaliya Barcelona, xulka qaranka Spain iyo tartanka Champions League.
Fati ayaa haatan boos joogta ah ka heysta kooxda Barcelona isagoo ka garab ciyaaraya Lionel Messi wuxuuna booska kala baxay Antoine Griezmann, Ousmane Dembele iyo Francisco Trincao.
Da’ yarkaan ayaa sidoo kale dhawaan u ciyaaray xulka qaranka Spain isagoo dhaliyay hal gool afar kulan uu u saftay, wuxuuna kulankiisii ugu horeysay ee xulka Spain uu ciyaaray bishii September.
