Muqdisho (AX) — Dhulgariir cabbirkiisu yahay 6.0 ayaa ruxay Gacanka Cadmeed aroornimadii hore ee Jimcaha, isagoo ku dhuftay biyaha u dhexeeya Soomaaliya iyo Yemen, sida ay sheegtay Hay’adda Sahanka Juqraafiyeed ee Mareykanka (USGS).
Gariirkaas oo qoto-dheeraantiisu yarayd ayaa dhacay 12:07 habeenimo waqtiga maxalliga ah, ama 2107 GMT fiidnimadii Khamiista, qiyaastii 145 kiiloomitir u jira xeebaha Soomaaliya, ayay USGS sheegtay.
- Advertisement -
Hay’addu waxay heerka gariirka ku sheegtay darajada IV ee miisaanka xoogga Mercalli, taasoo muujinaysa in laga yaabo in gudaha dhismayaasha laga dareemay isla markaana ay toosin kartay qaar ka mid ah dadka deggan.
Heerkaas, weelasha, daaqadaha iyo albaabbadu way gilgilan karaan, halka darbiyaduna ay samayn karaan dhawaaqyo dillaac ah. Dadku waxay sidoo kale dareemi karaan walxo culus oo ku dhacaya dhismayaasha, baabuurta la dhigeyna si muuqata ayay u ruxmi karaan.
Dhulgariirrada ka sarreeya cabbirka 6.0 waa kuwo naadir ka ah Soomaaliya iyo deegaannada ku xeeran, taasoo ka dhigaysa dhacdadii Jimcaha gariir aan caadi ahayn oo xooggan isla markaana xusid mudan gobolka, sida ay sheegeen mas’uuliyiintu.
Illaa iyo hadda ma jiraan warar degdeg ah oo kasoo baxay dhaawacyo, dhimasho ama burbur.
