Soomaaliya: Mareykanku ma aqoonsan doono Somaliland, ayuu yiri taliyaha AFRICOM
MUQDISHO — Mareykanku wax qorshe ah uma laha inuu aqoonsado Somaliland, ayuu taliyaha Taliska Mareykanka ee Afrika (AFRICOM), Jeneraal Dagvin R. Anderson, ka sheegay Muqdisho, isaga oo mar kale xaqiijiyey taageerada Washington ee madaxbannaanida iyo wadajirka dhuleed ee Soomaaliya.
Anderson, oo hadlayey intii uu booqasho ku joogay caasimadda Soomaaliya, ayaa sidoo kale meesha ka saaray wararka la isla dhexmarayo ee sheegaya in Mareykanku qorsheynayo inuu saldhig militari ka sameysto Somaliland. Hadalladiisa ayaa daba socda booqashooyin ay saraakiisha AFRICOM sannadihii u dambeeyey ku tageen jamhuuriyadda iskeed ugu dhawaaqday madaxbannaanida.
Waxa uu sheegay in Washington ay sii wadi doonto caawinta Soomaaliya si ay u horumariso ammaankeeda, xasilloonideeda iyo horumarkeeda, isla markaana ay diyaar u tahay inay si dhow ula shaqeyso dowlad ay ka go’an tahay wax ka qabashada caqabadaha amni iyo hirgelinta danaha la wadaago.
“Shacabka Soomaaliyeed waxay mudan yihiin nabad, amni iyo barwaaqo,” ayuu yiri Anderson. Waxa uu intaas ku daray in gaarista horumar waara ay ugu dambayn ku xirnaan doonto hoggaanka dowladda federaalka Soomaaliya iyo go’aanka adag ee shacabka Soomaaliyeed.
Waxa uu sheegay in Mareykanku sii wadi doono iskaashiga uu la leeyahay Soomaaliya, isaga oo carrabka ku adkeeyey in guulaha waara ay u baahan doonaan wadashaqeyn dhow iyo hindiseyaal ay Soomaalidu hoggaaminayso.
Hadalka Anderson ayaa gacan ka geysan kara dejinta wararka la isla dhexmarayo ee sheegaya in Washington ay ku dayan karto Israa’iil oo ay aqoonsan karto madaxbannaanida Somaliland. Israa’iil ayaa bishii Diseembar ee sannadkii hore aqoonsatay Somaliland, halka Mareykanku uu sii waday taageerada xuduudaha Soomaaliya ee caalamku aqoonsan yahay.
AXADLETM
