Telefishin-baahiyaha Mareykanka Savannah Guthrie ayaa si qiiro leh u codsatay in la bixiyo xog ku saabsan maqnaanshaha hooyadeed, iyadoo sheegtay in qoysku “gargaar baryayo” lix bilood kaddib markii la afduubtay Nancy Guthrie oo 84 jir ah.
Nancy Guthrie ayaa la waayay habeenkii u dhexeeyay 31 Jannaayo iyo 1 Febraayo. Muuqaallo amni oo dib loo helay ayaa muujinaya qof wejiga duubtay oo galoofyo xiran, kuna dhex wareegaya bannaanka gurigeeda oo ku yaalla duleedka Tucson, Arizona.
Daawo: FBI-da oo baahisay muuqaalka nin wejiga duubtay oo jooga albaabka hore ee guriga hooyada weriye telefishin oo la la’yahay
“Maalin kasta, waan soo toosnaa, waxaanan isku daynaa inaan adkaysanno oo nolosha sii wadno – sababtoo ah taasi waa wixii ay hooyadeen farxadda iyo adkaysiga badnayd na bartay inaan samayno.
“Laakiin yaan la isku khaldin – qalbiyadeennu way burbursan yihiin,” ayay Savannah Guthrie ku qortay qoraal ay soo dhigtay Instagram.
Savannah Guthrie waxay sheegtay in ‘qalbiyadoodu burbursan yihiin’
Waaxda Sheriff-ka Degmada Pima ayaa Jimcihii sheegtay in baaritaanku weli socdo, isla markaana raadinta Nancy Guthrie ay sii socoto. Waxay sidoo kale baahisay laba warqadood oo la sheegay inay yihiin dalab madax-furasho, kuwaas oo loo diray telefishin maxalli ah 2-dii iyo 6-dii Febraayo.
Warqaddii koowaad waxay dalbatay madax-furasho, waxayna ku hanjabtay nolosha Nancy Guthrie. Tan labaad waxay muujisay qoomammo, waxayna sheegtay inay ku dhimatay intii la haystay oo “hadda lagu aasay meel dabiici ah”.
Maydkeeda lama helin, mana jiraan tuhmanayaal hadda la aqoonsan yahay.
Savannah Guthrie, walaalkeed iyo walaasheed ayaa baahiyay dhowr farriimood oo muuqaal ah oo ay ku codsanayaan in hooyadood la soo celiyo
Mas’uuliyiinta iyo qoyska Guthrie waxay ka codsanayaan qof kasta oo garan kara luuqadda ama far-qoraalka warqadaha, ama arkay isbeddel kedis ah oo ku yimid hab-dhaqanka saaxiib ama qaraabo, inuu la xiriiro baarayaasha.
“Qof baa wax og. Qof baa wax ka shakisan. Qof baa garanaya far-qoraalka ku jira warqadaha dalabka madax-furashada.
“Qof baa arkay wax ka duwan, yaab leh, walaac leh ama si fudud aan caadi ahayn – lagana yaabo inay ku lug leedahay qof uu si qoto dheer u jecel yahay,” ayay Savannah Guthrie ku qortay qoraalka subaxnimadii Jimcaha.
“Waxaa jirta waddo looga baxo – inaad sheegto waxa aad ogtahay… Waxaa jirta waddo lagu soo afjari karo xaaladdan laguna samayn karo waxa saxda ah,” ayay raacisay.
Baarayaashu waxay abaalmarin u ballanqaadeen xog la xiriirta kiiskan, waxayna marar badan adkeeyeen in xogta si qarsoodi ah loo gudbin karo.
Xigasho: AFP
