Sarkaal sare oo ka tirsanaa milatariga Nigeria ayaa lagu dilay Abuja, kaddib markii dabley hubeysan ay isku dayeen inay ka afduubtaan gurigiisa, sida ay masuuliyiintu sheegeen. Sarkaalka, oo lagu magacaabi jiray Korneyl Abdussalam Ude, ayaa la sheegay inuu ku dhintay is-rasaaseyn isaga iyo weeraryahannada ku dhexmartay hoygiisa oo ku yaalla xero ay leeyihiin ciidamada, sida ay sheegtay Hay’adda Sirdoonka Difaaca Nigeria. “Hay’adaha amniga iyo kuwa fulinta sharciga ayaa bilaabay baaritaan buuxa oo ku saabsan dhacdadan, waxaana la sameynayaa dadaal kasta oo lagu aqoonsanayo, lagu soo xirayo, laguna maxkamadeynayo kuwa mas’uulka ka ah,” ayaa lagu yiri bayaan ka soo baxay ciidanka.
Ciidanku waxay qoraalkooda tacsida ah ku tilmaameen Ude sarkaal u heellan waajibaadkiisa, oo dalka ugu adeegay “daacadnimo aan caadi ahayn, xirfad-yaqaannimo iyo ka-go’naansho aan leexleexad lahayn”. Dilkan ayaa muujinaya walaaca amni ee weli ka jira agagaarka xerada ciidamada, oo hore loo bartilmaameedsaday weerarro sababay afduubyo iyo dhimasho.
