Ciidamada Booliska Gaarka ah ee Haramcad oo Saldhig ku leh Magaalada Dhuusamareeb ayaa fuliyay howlgal qorsheysan oo ka dhacay Gobolka Galgaduud sida saraakiisha Ciidanku sheegeen.
Howlgalka waxaa uu si gaar ah uga dhacay deegaannada Ceel Garas iyo God-Dhurwaa, Ciidanka Haramcad ayaa gacanta kusoo dhigay xubno katirsan Al-Shabaab oo ahaa bartilmaameedka howlgalkooda.
Taliye ku xigeenka Ciidanka Booliiska Gaarka u tababaran Cabdixamiid Cabdullaahi Maxamed (Fanax) ayaa howlgalka hoggaaminayay, waxaana uu sheegay in ay gacanta ku hayaan 7-Xubnood oo katirsan Al-Shabaab.
Askarta howlgalka ka fulisay Gobolka Galgaduud ayaa dhawaan laga qaaday Magaalada Muqdisho oo bilooyin kahor looga daabulay furmashada shirkii Dhuusamareeb (2) oo qaadistooda shuruud ka dhigeen Axmed Madoobe & Siciid Deni.
Al-Shabaab ayaa culeys saartay deegaanno dhaca Duleedka Magaalada Dhuusamareeb oo ay dhawaan dagaal kula gashay Ciidamada Xoogga dalka gaar ahaan Guutada 15-aad ee qaybta 21-aad CXDS.
Deegaanno iyo degmooyin katirsan Gobolka Galgaduud waxaa ku sugan Al-Shabaab, marar badan maamulka Galmudug waxa uu ku dhawaaqay howlgal ka dhan ah Shabaab si gacanta loogu dhigo goobaha ay maamulaan.
Axadle.
