Trump oo ansixiyay heshiis ballaaran oo iskaashi nukliyeer rayid ah oo dhex maraya Mareykanka iyo Sacuudiga
WASHINGTON – Madaxweynaha Mareykanka Donald Trump ayaa jidka u furay barnaamij nukliyeer rayid ah oo Sacuudigu yeesho, kaddib markii uu ansixiyay heshiis iskaashi oo taariikhi ah oo soconaya 30 sano, kaas oo boqortooyada u oggolaan kara inay yuraaniyamka tayeyso iyadoo la raacayo shuruudo qeexan.
Heshiiskan oo lagu qiimeeyay tobannaan bilyan oo doolar ayaa la filayaa inuu shirkadaha Mareykanka safka hore ka geliyo dadaallada lagu dhisayo kaabeyaasha nukliyeerka ee Sacuudi Carabiya. Waxa kale oo uu oggolaan karaa in gudaha dalka laga sameeyo xarun lagu tayeynayo yuraaniyamka, haddii daraasad farsamo oo wadajir ah oo Mareykanka iyo Sacuudigu sameeyaan ay sidaas ku taliso.
Maamulka Trump ayaa sheegay in qorshahani Washington siin doono kormeer ballaaran oo ku saabsan barnaamijka nukliyeerka Sacuudiga, isla markaana gacan ka geysan doono ka hortagga in tiknoolajiyadda rayidka loo weeciyo adeegsiga milatari.
Hase yeeshee, khubarada ka hortagga faafitaanka hubka nukliyeerka iyo qaar ka mid ah xubnaha Koongareeska ayaa dhaliilay heshiiska, iyagoo ka digay inuu kordhin karo halista faafitaanka nukliyeerka ee Bariga Dhexe.
Heshiiskani wuxuu ka duwan yahay qaar ka mid ah heshiisyadii hore ee iskaashiga nukliyeerka Mareykanka, maadaama laga reebay dhowr ka mid ah dammaanad-qaadyadii adkaa ee ka hortagga faafitaanka nukliyeerka ee Washington ay ka dalbatay saaxiibbo kale.
Waxa kale oo uu ka dhigan yahay in laga leexday siyaasaddii madaxweynihii hore Joe Biden, taas oo iskaashiga nukliyeerka Mareykanka iyo Sacuudiga ku xirtay in boqortooyadu ay xiriirka caadi ka dhigto Israel.
Heshiiska ayaa la filayaa in dib-u-eegis loo horgeeyo Koongareeska, inkastoo kuwa ka soo horjeeda ay u baahan doonaan aqlabiyad gaar ah oo labada aqal ah si ay u hor istaagaan.
AXADLETM
