Mucaaradka Soomaaliya oo Beeniyey inuu Doonayo Dib loogu Laabto Dowlad Kumeelgaar ah
MUQDISHO — Xildhibaan mucaarad ah Cabdiraxmaan Cabdishakuur Warsame ayaa beeniyey sheegashooyinka sheegaya in isbahaysigiisa siyaasadeed uu doonayo in dib loo soo celiyo dowlad kumeelgaar ah oo Soomaaliya yeelato, isaga oo sheegay in baaqii ay u direen saaxiibada caalamka lagu soo jeediyey xal siyaasadeed oo laga gaaro ismari-waaga doorashada ee ka dhashay dhammaanshaha muddo-xileedka dowladda federaalka.
Warsame, oo xubin ka ah Golaha Mustaqbalka Soomaaliyeed ee mucaaradka, ayaa sheegay in isbahaysigu soo jeediyey in la dhiso hay’ad kumeelgaar ah oo kormeerta doorashooyinka, dalkana hagta inta lagu jiro marxalad kala-guur ah haddii hoggaamiyeyaashu awoodi waayaan inay dhisaan maamul xil-gaarsiin ah.
“Farriintayadu waxay ahayd in qalalaasaha Soomaaliya uu yahay mid siyaasadeed, xalkiisuna sidoo kale yahay inuu noqdo mid siyaasadeed. Laguma xallin karo tallaabooyin amni iyo taageero dhaqaale oo keliya,” ayuu yiri Warsame.
Waxa uu sheegay in dastuurka ku-meelgaarka ah ee Soomaaliya uu dhigayo in maamul muddo-xileedkiisu dhammaaday uu sii shaqeeyo oo keliya isagoo ah maamul xil-gaarsiin ah, wuxuuna dowladda hadda jirta ku eedeeyey inay diidday inay ku shaqeyso xaddidaadahaas.
Sida ku cad soo-jeedinta mucaaradka, golaha kumeelgaarka ah ayaa la wareegi lahaa masuuliyadaha sida caadiga ah loo xilsaaro dowlad xil-gaarsiin ah. Waajibaadkaas waxaa ka mid noqon lahaa maareynta hannaanka doorashada, gacan ka geysashada dhexdhexaadinta heshiisyada siyaasadeed iyo ilaalinta dhexdhexaadnimada hay’adaha amniga inta ay doorashadu socoto.
Warsame ayaa sidoo kale ka digay in dowlad xukunka lagu sii hayo kaddib marka uu dhammaado muddo-xileedkeedu, iyadoo aanu jirin hannaan xil-gaarsiin ah, ay wiiqi karto sharciyadda hay’adaha dowladda. Waxa uu sheegay in saaxiibada caalamku ay muhiimad weyn siiyaan la-shaqeynta maamullada ay u arkaan kuwo dastuur ahaan sharci ah.
Xildhibaanka ayaa ugu baaqay hoggaamiyeyaasha siyaasadda Soomaaliya inay masuuliyad muujiyaan kana fogaadaan waxa uu ku tilmaamay “khamaarka siyaasadeed.” Waxa uu sheegay in dalku u baahan yahay wadahadal joogto ah iyo heshiis siyaasadeed oo wax-ku-ool ah si looga baxo ismari-waaga doorashooyinka.
Dowladda federaalka ayaan weli jawaab dadweyne ka bixin hadalladii ugu dambeeyey ee Warsame. Hadalladiisa ayaa imanaya iyadoo ay weli socdaan khilaafaadka u dhexeeya maamulka iyo kooxaha mucaaradka ee ku saabsan hannaanka doorashada iyo hirgelinta dastuurka. Saaxiibada caalamka ayaa marar badan ugu baaqay dhinacyada Soomaaliyeed inay gaaraan heshiis siyaasadeed oo loo dhan yahay.
AXADLETM
