Muqdisho (AX) — Laba taliye oo ka tirsanaa Al-Shabaab ayaa lagu dilay hawlgallo kala duwan oo ay fuliyeen ciidamada deegaanka gobolka Shabeellaha Dhexe ee Soomaaliya 21-kii Agoosto, sida ay sheegtay Wasaaradda Gaashaandhigga.
Wasaaraddu waxay sheegtay in ciidamadu ay weerar ku qaadeen fariisin ay Al-Shabaab ku dhuumaaleysanayeen oo ku taalla duleedka Daaru-Nicma, halkaas oo lagu dilay Xasan Xuseen Hurshow, oo loo yiqiin naanaysta Xasan Garabdheere.
- Advertisement -
Sida ay wasaaraddu sheegtay, Garabdheere wuxuu maamulayay hawlgallada Al-Shabaab ee deegaanka ay kooxdu ugu yeerto Sakawad, oo ay ku jiraan Adaddeey, Adaan-Lexeey iyo Daaru-Nicma ee degmada Ruun-Nirgood, Shabeellaha Dhexe.
Mid ka mid ah dagaalyahannadii loo xilsaaray ilaalinta taliyaha ayaa sidoo kale la dilay, halka xubin kale oo ka tirsanaa Al-Shabaab uu dhaawacmay, sida lagu sheegay bayaanka.
Hawlgal kale oo gaar ah oo isla maalintaas laga fuliyay Tawakal ayay ciidamada deegaanka ku dileen hoggaamiye kale oo ka tirsanaa Al-Shabaab, kaas oo wasaaraddu ku aqoonsatay Cabdullaahi Faadhuud.
Wasaaradda Gaashaandhigga ayaa ku ammaantay dadka deegaanka iyo ciidamada bulshada taageerada ay siinayaan ololaha ka dhanka ah Al-Shabaab, iyadoo sheegtay in doorkoodu uu sii noqonayo mid aad muhiim ugu ah dadaallada lagu wiiqayo ugu dambayna lagu ciribtirayo kooxda mintidiinta ah.
