Maxkamad Hindiya ku taalla ayaa 44 burcad-badeed Soomaali ah ku xukuntay xabsi daa’in
MUMBAI: Maxkamad Hindiya ku taalla ayaa 44 muwaadin oo Soomaali ah ku ridday xabsi daa’in, kaddib markii lagu helay inay afduubteen maraakiib isla markaana shaqaalahooda ku haysteen la-haystayaal meel ka baxsan xeebaha dalkaas Bariga Afrika.
Xukunnadan ayaa ka dhashay laba weerar oo kala duwan oo lagu qaaday markab xamuul qaada iyo doon kalluumeysi. Maraakiibta ciidamada badda Hindiya ayaa sannadkii 2024 soo badbaadiyey la-haystayaasha, waxayna gacanta ku dhigeen burcad-badeedda.
Dhammaan 44-ka eedaysane ayaa intii ay dacwaduhu socdeen qirtay dambiyada, sida ku cad xukunnadii ay maxkamad gaar ah oo ku taalla Mumbai ka soo saartay labada kiis Isniintii.
“Falalka burcad-badeednimo ee badweynta ka dhaca, sida afduubashada markab, shaqaalaha oo madax-furasho awgeed loo haysto, isku dayga in la dilo iyo in gaashaan bani’aadan ahaan loo adeegsado, waa arrimo aad u culus oo aan si fudud loo qaadan karin,” ayuu yiri Garsoore SB Dige.
Weerarkii koowaad wuxuu dhacay Diseembar 2023, markaas oo 35 Soomaali ah ay qabsadeen markabka xamuulka qaada ee MV Ruen, kaas oo watay calanka Malta. Sagaal kale ayaa bishii Maarso 2024 afduubtay doonta kalluumeysiga ee Al Kambar, oo watay calanka Iran.
Warbaahinta maxalliga ah ayaa sheegtay in eedaysanayaasha, oo tan iyo 2024 lagu hayey xabsiga Taloja ee Navi Mumbai, ay maxkamadda ka soo muuqdeen markii lagu dhawaaqayey xukunnadooda xabsi daa’inta ah.
Waxay maxkamadda ka codsadeen in dib loogu celiyo Soomaaliya, halkaas oo ay doonayeen inay wajahaan habraacyo sharci.
Burcad-badeednimadu waxay dhibaato weyn ku haysay biyaha ka baxsan xeebaha Soomaaliya sannadihii 2000-meeyadii, iyadoo heerkii ugu sarreeyey gaartay 2011, markaas oo ay dhaceen boqollaal weerar. Khatarta ayaa tan iyo xilligaas si weyn hoos ugu dhacday, kaddib markii la geeyey ciidamo caalami ah oo badeed, shirkadaha maraakiibta ganacsiguna ay qaateen tallaabooyin cusub oo amni.
Ciidamada badda Hindiya ayaa tan iyo 2008 ka hawlgalayey biyaha ka baxsan Soomaaliya. Waxay xoojiyeen hawlgallada ka dhanka ah burcad-badeedda sannadkii 2023, kaddib markii weerarradu kordheen, oo ay ku jireen dhacdooyin ka dhacay Badda Carabta iyo weerarro ay Badda Cas ka geysteen fallaagada Xuutiyiinta Yemen ee Iran taageerto.
